پروفیسراجمل خان راخلاص شو
[29.Aug.2014 - 17:00]29.08.2014 :سرچينې وايي د پاکستاني طالبانو لخوا څلور کاله وړاندې تښتول دخيبرپښتونخوا صوبې د سرښار پيښور داسلاميه کالج يونيورسټۍ وائس چانسلر پروفيسر اجمل خان امنيتي ځواکونو شمالي وزيرستان کې د عملياتو په مهال د تښتوونکو د منگولو څخه روغ رمټ راخلاص کړى اؤ نوموړى خپل کور ته رسيدلى دى.
دخيبرپښتونخوا صوبې وزيراعلي پرويزخټک د پروفيسر اجمل خان په راخوشې کيدو دخوشحالۍ څرگندونه کړې اؤ وئيلي يې دي اوس د صوبې ځواکونه دومره پياوړي کړل شوي چې نور به څوک د اجمل خان غوندې تعليمي شخصيات د صوبې نه ونۀ تښتوي
پروفيسر اجمل خان چې دتعليم په څانگه کې يو ځلنده نوم دى په ستمبرکال 2010ء کې وسله والو طالبانو دپيښور څخه هغه مهال تښتولى ؤ کله چې هغه په خپل گاډي کې يونيورسټي ته روان ؤ.
پاکستاني طالبانو داجمل خان سره د هغۀ ډرائيور هم تښتولى ؤ خو وروستو يې دغه ډرائيور خوشې کړى ؤ اؤ د اجمل خان د خوشې کولو دپاره يې حکومت ته د ځينو هاغو مهمو طالب مشرانو دخوشې کولو غوښتنه کړې وه چې په حکومتي زندانونو کې پراتۀ دي.
پروفيسر اجمل خان د عوامي نيشنل پارټۍ د مشر اسفنديار ولي خان نزدې خپلوان دى اؤ هغه دعوامي نيشنل پارټۍ د حکومت په مهال تښتول شوى ؤ.
د تښتول کيدو وروستو دپاکستاني طالبانو تحريک دپروفيسراجمل خان گڼ شمير ويډيو اؤ اډيو پيغامونه خپارۀ کړي وؤ په کوم کې چې هغه دحکومت نه غوښتي وؤ چې صحت يې د طالبانو په بند کې ډير خراب دى اؤ بايد دهغۀ د خوشې کيدو دپاره د طالبانو غوښتنې ومنل شي .
خو دعوامي نيشنل پارټۍ اؤ دهغې نه وروستو حکومتونو د اجمل خان د خوشې کيدو په اړه د طالبانو غوښتنې رد کړې وې.
د زيارت په شپه ناوخته پوځي سرچينو وئيلي چې پاکستاني پوځيانو پروفيسر اجمل خان په خيريت سره د تښتوونکو دمنگولو څخه راخلاص کړى خو دا نه ده په ډاگه شوې چې دهغۀ تښتوونکي هم نيول شوي اؤ که نه ؟
دپاکستاني ميډيا وينا ده چې اجمل خان خپل کور ته رسيدلى اؤ دهغۀ د کورنۍ غړو اؤ مدني ټولنو د پروفيسراجمل خان په خوشې کيدو د خوشحالۍ څرگندونه کړې ده.
دخيبرپښتونخوا وزيراعلي پرويز خټک وائس اف امريکه ډيوه راډيو ته پخپل يو ليږلي بيان کې د پروفيسر اجمل خان په راخوشې کيدو اؤ کور ته په خيريت سره په رسيدو دخوشحالۍ د څرگندونې ترڅنگ د پوځ کردار ستائيلى اؤ وئيلي يې دي چې د اجمل خان راخلاصيدل د امنيتي ځواکونه يوه ستره کاميابي ده.
هغه وئيلي اوس يې دصوبې امنيتي ځواکونه زيات پياوړي کړي اؤ ورانکاري نه شي کولى چې د اجمل خان په څير د صوبې مهم شخصيات د ټوپک په زور اغواء کړي