۲۰۰۱ راپدیخوا یولک تنه وژل شوي
[02.Jun.2015 - 19:32]له ۲۰۰۱ کال څخه را پدې خوا د افغانستان په جګړه کې شاوخوا یولک تنه وژل شوي
د امریکا د براون پوهنتون له یوه څېړنیز راپور سره سم، له ۲۰۰۱ څخه، چې امریکايي پوځیان افغانستان ته تللي دي، د دغه هیواد په جګړو کې شاوخوا یو لک تنه وژل شوي دي.
په دې څېړنیز راپور کې، چې «د جګړې بیه» نومېږي او د براون پوهنتون د نړیوالو څېړنو واټسن انستیتیوت کړې ده، له ۲۰۰۱ څخه تر تېر کال پوري د افغانستان او پاکستان په جګړه کې د وژل شویو او ټپیانو شمېر ته کتنه شوې ده.
راپور وايي چې ټولټال ۱۴۹۰۰۰ تنه وژل شوي او ۱۶۲۰۰۰ سحت ټپیان شوي دي.
د راپور لیکواله نیتا کراوفورډ وايي چې په وروستیو کلونو مرګ ژوبلې لا زیاتې شوي او له دې داسي ښکاري چې د افغانستان جګړه پای ته نه ده رسېدلې بلکې مخ په بدتره کېدو ده.
د ډېرو امریکایانو لپاره د افغانستان جګړه پای ته رسېدلې ځکه چې د دوی پوځیان د جګړې له میدانه وتلي او نور مرګ ژوبلې نه وراوړي.
ملګري ملتونه وايي چې د روان ۲۰۱۵ کال په لومړیو درو میاشتو کې د ملکیانو تلفات د تېر کال د ورته مودې په پرتله په سلو کې ۱۶ زیات شوي یعني ۹۷۴ تنه وژل شوي او ۱۹۶۳ ژوبل شوي دي.
د کال په لومړیو دریو میاشتو کې لا طالبانو پسرلني عملیات نه ول پیل کړي. د طالبانو له بریدونو داسي ښکاري چې د تېرو کلونو په پرتله به د جګړې د شدت له کبله د ملکیانو مرګ ژوبلې څو برابره زیاتې شوي وي.