هر کله راشه
[14.Jul.2015 - 18:46]تلے سپرلے په سرو ګلونو دَ پښتون راځي
هر کله راشه
فخر افغانه! ستا راتلو سره ژوندون راځي
هر کله راشه
د سر درياب زمونږ بې تاجه، بې قلنګه باچا
د هر پښتون د زړۀ په تخت، ناسته ملنګه باچا
د غېرتونو په دنيا کښې ډک له ننګه باچا
تاپسې قام لکه لېلا پسې مجنون راځي
هر کله راشه
تلے سپرلے په سرو ګلونو دَ پښتون راځي
هر کله راشه
د سرو غوټيو شوکېدلي زړونه بيا تازه شو
په اسوېلو کښې لوګېدلي زړونه بيا تازه شو
د خوارو زارو غم زپلي زړونه بيا تازه شو
دا ستا قدم دے کۀ سپرلے په دې مضمون راځي
هر کله راشه
تلے سپرلے په سرو ګلونو دَ پښتون راځي
هر کله راشه
د خېبر خولۀ کښې چې به تا دَ صبر جنګ جوړ کړو
په انګلستان کښې به قيامت دې په پېرنګ جوړ کړو
د ننګيالو په وينو تا دَ وطن رنګ جوړ کړو
نن چې راځي نوے سبا مو دَ پرون راځي
هر کله ر اشه
تلے سپرلے په سرو ګلونو دَ پښتون راځي
هر کله راشه
خبر ئې! قبر دَ قاضي کښې څۀ اواز ؤ سحر
په مقبره کښې دَ بابړې دا څۀ ساز ؤ سحر
د لتاړ شوي انغرو، لوګو کښې راز ؤ سحر
وې چې دَ ټولو ارمانونو مو پرېکون راځي
هر کله راشه
تلے سپرلے په سرو ګلونو دَ پښتون راځي
هر کله راشه
تا سره وينې علامې دَ ابادۍ پښتانۀ
په تا غونډېږي پس له ډېرې بربادۍ پښتانۀ
هيله به پوهـ شي په خوږو دَ ازادۍ پښتانۀ
د ظلم شپې پسي دَ عدل سباوون راځي
هر کله راشه
تلے سپرلے په سرو ګلونو دَ پښتون راځي
هر کله راشه