پوهنتون د باچاخان
[26.Jan.2016 - 21:10]{نظم}
په سرو وينو کې ډوب دی پوهنتون د باچاخان
نيولی مو دی تور پنجاب په خون د باچاخان
پر خپله خاوره خپل اختيار قانون د باچاخان
لوستل به يو وار بيا غواړي مضمون د باچاخان
ماتېږي نه په هيڅ وخت کې تړون د باچاخان
هم نن د باچاخان دی، هم پرون د باچاخان
د ټول پښتون په تن کې د ژوند سا وغړېده
په غږ د باچاخان او په پاڅون د باچاخان
"د قام ناتار په قام ګرځي" - اصول د قامولۍ
خو دغه کار به غواړي زړه چاؤدون د باچاخان
دا خلک د پنجاب دي وارثان د پېرنګي
له دوی سره راتلی نه شي سمون د باچاخان
لمحه لمحه يې تېره ده په ننګ د آزادۍ
ما لوستی سر تر پايه دی ژوندون د باچاخان
بېرون ځنې چاپېر وو زنځيرونه، زولنې
خو ډک له رڼاګانو وو اندرون د باچاخان
اوس هم تمه له ده شي د دې قام د رهبرۍ
لوی شوی دا سړی دی پر ځنګون د باچاخان
که قام ته کله ورشو موږ په شان د باچاخان
تحريک د باچاخان به وي او يون د باچاخان
ټولېږي له دې زمکې به سپېرې دوړې د جنګ
که کړو د فکر تخم پرې زرغون د باچاخان
د قام د کوڅو خاورې به ساتل وې پر لېمو
بيا خېژو په معيار او په ارزون د باچاخان
برباد به وي تر څو چې وي پښتون د پاکستان
آباد به وي چې کله شي پښتون د باچاخان
[خان زمان کاکړ]
۲۱ جنوري ۲۰۱۶