باچا خان په مزار
[13.May.2017 - 18:41]د باچا خان بابا په مزار
ششدر ولاړ ستا د مزار په چوکاټ
په کومو سترګو به اوس تاته مخ شم
تا اولسونه راغونډ کړي بابا
ما نه د قام وجود ذرې ذرې شو
ستا جهاني مینې رڼا زرغن کړه
ما نه مشال توره تیاره کښې ډوب شو
تا ملالۍ ده ژوند ډګر ته بوتلې
ما د ملالې حوصله سنګسار کړه
تا خو خپل ځان ؤ ویلې کړی بایا
زه د خپل ذات نه راوتلی نه شم
ته د انسان د عظمتونو عاشق
زما په لاسو د بشر وینې دي
ستا هشتنغر او پیښور زخمي دی
جلال آباد او کابل اور اغستی
ددې ژوندون څلي مې وینې بابا؟
د پښتونخوا ګلونه وینې بابا؟
ددې وطن ښارونه وینې بابا؟
ستا د ماهپر او د ایلم درو کښې
مرګ په ټوپونو دی هر کور ته درومي
ستا د پغمان او براول درو کښې
ژوند ساه نیولی دی تیارو ته درومي
جولۍ مې تشه او لاسونه خالي
دغه یو لوظ مې دی راؤړی بابا
دا تورې شپې د هندوکش لمن کښې
چې روڼ سحر نه وي مزل به کوم
خادم حسین