ازادي
[24.Apr.2019 - 10:58]
پتنګ د بلې شمعې يار دې
بلبل د ګلو خريدار دې
د ليلا دوه سترګې مجنون پېږني
د آزادۍ قيمت پښتون پېږني
پتنګ خو مينه په ګلزار نه لري
بلبل د شمعې سره کار نه لري
پښتانه ټيټ چاته کتلې نه شي
د چا اثر لاندې کېدلې نه شي
نه د چا زر او نه پېسو ته ګوري
زوې د پښتون د پلار پښتو ته ګوري
پښتون د بدو نه بېزار دې
پتنګ د بلې شمعې يار دې
پېسه په ښه سترګه قارون پېږني
د آزادۍ قيمت پښتون پېږني
الٰهی ته شې نګهبان د پښتون
نۀ کړې زوال نوم او نښان د پښتون
همه د علم خاوندان کړې ربه
په خپل کرم ې عالمان کړې ربه
ګوندې نفاق نه په امان کړې پښتون
د اتفاق په لور روان کړې پښتون
زه ملنګ جان يم پروانه د وطن
سر مې دې ايښې نذرانه د وطن
خدايه لوګې مې کړې په لار د وطن
چې عاشقانو کښې شم شمار د وطن
ډک مې له درده دا ګفتار دې
پتنګ د بلې شمعې يار دې
د مريض نبض اپلاتون پېږني
د آزادۍ قيمت پښتون پېږني
........
د ملنګ جان خوږې نغمې— Malang Jan