25.01.2024قلندر مومند ته
[25.Jan.2024 - 09:47]
قلندر مومند ته د اجمل خټک پېرزوئينه
زما مئينه خوږه مسته قلندره ياره
ليونې ياد دې تر قفسه په ګډا شی راشی
د نازک زړه د بيلتانه سوکړو وهلې ګل ته
سپرلې د مينې د جنت نه په خندا شی راشی
زما مئينه خوږه مسته قلندره ياره
ستا حسين ياد د غيرتونو د لمحو بڅرے
د خوشحال وينې ته لمبې د ايمل خان شی راشی
ستا د جنون د ارمانونو ماه جبينه ناوې
په پښتونخوا کښې سور بيرغ د باچا خان شی راشی
زما مئینه خوږه مسته قلندره ياره
راشه راخور شه لږ په فن او په غيرت مې ګله
چې مې پنجره کښې د کاکا د څنګ ښکلا پيدا کړې
زما پښتو ته د خيبر د سر شغله شه راشه
چې په تيارو کښې د کامل د زړه رڼا پيدا کړې
زما مئینه خوږه مسته قلندره ياره
راشه راپټې کړه لږ راوړه د ماضی له جيبه
د اولسی ادبی دور هغه شيرينې لمحې
د خوار اولس په غم ککړ د خوشحالۍ خوبونه
ست د ګجرو زما د چغې زرزرينې لمحې
زما مئینه خوږه مسته قلندره ياره
زما ميينه خوږه مسته قلندره ياره
راشه زما د يادو کور ته خپل ګلونه راوړه
د رحمان زويه نن د نظم او غزل په فن کښې
د باګرامۍ ترکې ښايسته شينکی خالونه راوړه
زما مئینه خوږه مسته قلندره ياره
منم ستا سره وينه کښې بويُین د پښتی حرارت
زما هډ هډ نه په مزل کښې غورځنګونه غواړی
ستا د ارمان د سباون په پلوشو کښې ګرمی
زما په لار کښې د لالا سره کفنونه غواړی
زما مئینه خوږه مسته قلندره ياره
پوهيږم ستا خلهُ کښې صدا د تاترې د ګوګل
په دې خورو ورو زړګو کښې اتڼونه غواړی
ستا د قلم خلهُ کښې چغارې د پښتو د سپرلی
په غر او سمه د وطن سمسور ګلونه غواړی
زما مئینه خوږه مسته قلندره ياره
د ارمانونو ولولو د ګل غوټو داغونه
د فن د ګلو يي مسکا کړه تر پنجرې يي راوړه
د خپل زړګی د شمعې ټولې ځليدونکی اوښکې
د وخت تورتم پسې رڼا کړه تر پنجرې يي راوړه
زما مئینه خوږه مسته قلندره ياره
راشه چې ټوله مينه ورکړو د قلم څوکې له
د خپلو ژوبلو احساساتو نه نغمې جوړې کړو
د زړه تارونه سرې لمبې کړو د زلمو وينو کښې
د انقلاب په چغه نوې ولولې جوړې کړو
د زړه له وينې د وطن د مخ ګلونه جوړ کړو
د وخت تيارو نه د شهۍ دزلفو ولونه جوړ کړو
زما ميينه خوږه مسته قلندره ياره
راشه راخور شه لږ په فن او په غيرت مې راته
انتخاب : عبدالحميد زاهد
پښتو انتخاب شاعري
Abdul Hameed Zahid