عاشقان
[11.Sep.2019 - 09:11]په رموز د عاشقانو عاشقان پوهېږي بس
په طلب د طالبانو طالبان پوهېږي بس
.
په ضمیر د نخلبندو نخلبند سړی خبر وي
په تصویر د نقاشانو نقاشان پوهېږي بس
.
چې کښتۍ پکې بیایي، په عظیم دریاب ګډېږي
په بیولو د کښتۍ ملاحان پوهېږي بس
.
چې ګردش یې ورځ او شپه کا، د کامل انسان د پاره
په اسرار یې کاملان یا دا اسمان پوهېږي بس
.
سپینې ږیرې وَته بویه چې نظر په خپل قوت کا
او هوس د شوخې شنګې په دا خوان پوهېږي بس
.
نادانان د ملک څښتن کا، دانا هسې ورته ګوري
دغه پوهه د چا نه ده، پرې سبحان پوهېږي بس
.
چې خوشال یې په بیاض کې دا تازه تازه خبرې
نو په دا تازه خبرو سخندان پوهېږي بس
.
ارمغان خوشال خټک
مخ - ۴۰۱
رموز = د رمز ډېرګړی (جمع) = ۱) په سترګو، شونډو يا وروځو اشاره ٢) پټه اشاره، زونګه ٣) راز، پټه خبره
طلب = ۱) غوښتنه، رابلنه ۲) پور، قرض
طالب = ۱) غوښتونکی، طلب کوونکی ۲) زده کوونکی، شاګرد ۳) د ديني علومو زده کوونکی
ضمیر = وژدان، وجدان
نخلبند = ملیار، باغبان
نقاش = ۱) ګلکاري کونکی، نقش او نګار جوړونکی ٢) انځورګر، تصويرونه جوړونکی، مصور
ملاح = مانګی، ماڼګی، مړنګ، ماڼو، بېړۍ یا کښتۍ چلوونکی، کشتيوان
اسرار = خواله، راز
کامل = ۱) بشپړ، پوره ۲) بې عيبه، بې نقصه
بویه = کېدای شي، ګوندې، ښایي، شاید ، باید
شوخه شنګه = ۱) پر ځان باوره او ژوندۍ ښځه ۲) بې باکه، شریره، مسته ښځه يا جينۍ، چالاکه ښځه یا جينۍ
خوان = ۱) لوستی، باسواده، ، تعلیم یافته ۲) وړ، قابل، لایق ۳) سندرغاړی ۴) مجمه، پتنوس، څپوڼی، کندوری
څښتن = مېړه، خاوند، مالک
پوهه = پوهنه، علم
بیاض = هغه کتاب چې شاعر پکې خپل شعرونه لیکي
سخندان = ۱) خبرلوڅ، ځیرک، دانا ۲) وړ شاعر، قابل شاعر
(لیک او راټولونه: ممتاز خان)