تدبیر
[30.Oct.2019 - 16:26]څه سړی؟، څه یې تدبیر؟
هم هغه شي چې تقدیر
.
که جهان شي تېره تُوره
ستا په مرګ شي خلک خِیر
.
بې تقدیره به ونهٔ مرې
نه په تُوره، نه په تِیر
.
بې اجله مرګی نشته
تېغ وهه، مه کړه تقصیر
.
لکه کار د مړني دی
هسې کار نه دی د پیر
.
د غازیانو، شهیدانو
پروا نشته د سعیر
.
کُل ګټنه ده د تُورې
که کابل دی، که کشمیر
.
مړني دي چې یادېږي
په سندرو، په ویر
.
چې دروغ د تُورې لاف کا
د هغو نه یم دلګیر
.
تُوره بخره د خوشال
کان په کان خلک خبیر
.
تر اُووو پېړیو پورې
واړهٔ مړهٔ په تېغ، په تیر
.
دا د ځان ستاینه نه ده
حقیقت وایم په ځیر
.
.
تدبیر = چاره، کړنه، عمل
خِیر = خجل ، شرمنده
تِیر = غشی
تېغ = تُوره
تقصیر = ۱) نیمګړتیا ۲) تېروتنه ۳) ګرمتیا
سعیر = ۱) دوزخ، جهنم، د دوزخ یوې برخې نوم ۲) اور، لمبه ۳) ناتار، مصیبت
ګټنه = سوبه، برى، بریا
مړنی = مېړنی، تورزن، زړور، باتور، تکړه، دلاور
ویر = غم، ناورین، ناتار، ماتم
لاف = ځان ښوونه
دلګیر = ۱) متاثر ۲) خواشینی
بخره = برخه، حصه، ونډه
خبیر = خبر، پوه، جوت
اُووو پېړیو = اُووه (۷) پُشتونه
کان = خاندان، پښت (نسل)، پېړۍ، پشت
ځیر = توجه، پام
.د خوشال بابا دیوان
مخ -۳۶۶
.