(که سپوره وي که پوره وي نو په شریکه به وي (باچاخان)
Adab au Hunar / شعر، ادب او هنر
غزل
پكې د عشق بله ډيوه ده نور به څه وي زړه كې
جانانه ستا د ياد كيسه ده نور به څه وي زړه كې
كه د گشاېسته نظر دې غل يمه دروغ به نه وي
همدا د مينې رابطه ده نور به څه وي زړه كې
زړه كه منګولې ښخوې ستا په زړګي ښكلوكيه!
خو همدغه د زړه خوښه ده نور به څه وي زړه كې
چې په ټوپونو او خېزو دى د سينې قفس كې
لېونۍ مينه پرې خوره ده نور به څه وي زړه كې
چې وخت بې وخته مې تندى په تسليمۍ سيخېږي
پكې د خداى كور دى كعبه ده نور به څه وي زړه كې
د اسويليو بړاسو چې مې فضا نيولې
د محبت د اور لمبه ده نور به څه وي زړه كې
چې سر په سر ترې جنازې د ارمانو ووتې
پاتې يوه خړه هدېره ده نور به څه وي زړه كې
جانانه! راشه د نظر غسل پخپله وركړه
ها وروستنۍ هيله هم مړه ده نور به څه وي زړه كې
كه جبارخېل محبوب سايل وم ومه ستا د كوڅو
غاړه مې ستا په لور كږه ده نور به څه وي زړه كې
Jabar Khel
 بېرته شاته |
