(که سپوره وي که پوره وي نو په شریکه به وي (باچاخان)
Adab au Hunar / شعر، ادب او هنر
غزل
اختره راغلې د وير او سلګو كلي ته
سوال درته كومه لاړ شه بل د خوشحالو كلي ته
زما يتيم ماته سلګۍ كړي تاته څنګ وخاندم
دلته غوغا ده لاړ شه بل كوم د مزو كلي ته
زما د زړو پيوند پيوند جامو به څه اختر وي
زه غريو نيولى يم لاړ شه بل د خندېدو كلي ته
دلته په دې كلي كې غم دى يوه غوغا جوړه ده
ظالمه لاړ شه د شرنګ شرونګ چمبو كلي ته
زما وړې انجونه ژاړي د خپل پلار قبر ته
لاړ شه د ډول د باجو او سرونو كلي ته
يم وچې شونډې سپېرې څڼې لونګين نه لرم
لاړ شه د عطرو د لونګو خوشبويو كلي ته
فرياده دلته مې يتيمه خور كجل نه لري
لاړ شه رنجو دنداسو او د سرخو كلي ته.
Matiullah Faryaad
 بېرته شاته |
