دې حجرو کټونو ته، دلته مجلسونو ته

هم درنو خیلونو ته،  دې درنو کورونو ته

تس نس ټبرونو ته،  لویو نسبونو ته

خدایه امن راولې

خدایه امن راولې

ښکلو ابشارونو ته، دې ډکوسیندونو ته

هم خړو خوړونو ته، لویو میدانونو ته

ګورو ځنګلونو ته، ښکلو منظرونو ته

خدایه دې باغونو ته، رنګ په رنګ ګلونو ته

خدایه امن راولې

خدایه امن راولې

ګل ګل چمنونو ته، خدایه دې رنګونو ته

هم خدایه بامونو ته،  دې اشارتونو ته

دنګو چنارونو ته، دغه کمرونو ته

ډکو بازارنو ته،دې لوې سړکونو ته

خدایه امن راولې

خدایه امن راولې

تورو ماښامونو ته، سپینو سحرونو ته

هم مازیګرونو ته، ډک د مینې زړونو ته

هم وفا لوظونو ته، ټولو رواجونو ته

هم روایتونو ته، هم مو دوستورونو ته

خدایه امن راولې

خدایه امن راولې

دې عمارتونو ته ،دنګو دنګو غرونو ته

زرکو ته بازونو ته، زیړو شړشمونو ته

دې احترامونو ته، دلته عزتونو ته

خدایه امن راولې

خدایه امن راولې

دلته ګودرونو ته، توروشنو خالونو ته

لنډو قدمونو ته، تورو وربلونو ته

ښکلو رخسارونو ته،ډکو مړوندونو ته

خدایه امن راولې

خدایه امن راولې

ښکلو نظرونو ته، زلفو بالښتونو ته

دې انتظارونو ته، بلو مشالونو ته

ډکوسرو لاسونو ته، مستو مستو جنو ته

هم ساقي جامونو ته، هم مستو پیرونو ته

خدایه امن راولې

خدایه امن راولې

لوبو ته سازونو ته، دلته اتڼونو ته

جګو دستارونو ته، هم پټکي ولونوته

دلته اخترونو ته، هم جونو ټالونو ته

هم خوږو خوبونو ته، بیا د چا یادونو ته

خدایه امن راولې

خدایه امن راولې

ډک د ننګ سرونو ته، هم نرو مړونو ته

خدایه کاروانو ته، دغه لښکرونو ته

هم پټو فصلونو ته، خدایه دې نهرونو ته

ډکو درمنونو ته، دلته اشرونو ته

خدایه امن راولې

خدایه امن راولې

دلته کتابونو ته، دغه قلمونو ته

فکر ته سوچونو ته،عقل تدبیرونو ته

زړونو ته علمونو ته، لویو دماغونو ته

دغه اوازونو ته، دغه سبقونو ته

خدایه امن راولې

خدایه امن راولې

لویو جوماتونو ته، دلته مکتبونو ته

هم دې مندرونو ته، دې درمسالونو ته

دلته کالجونو ته، هم پوهنتونونو ته

دې تلاوتونو ته، دې عبادتونو ته

خدایه امن راولې

خدایه امن راولې

دې تودو رګونو ته، سرو وینو جوشونو ته

دلته لښکرونو ته، هلته سنګرونو ته

لر او بر قامونو ته، هم نمسو نیکونو ته

ټولوولسونو ته، هم زما شعرونو ته

خدایه امن راولې

خدایه امن راولې

هارون الرشید خټک