Adab au Hunar / شعر، ادب او هنر
شېخي
[02.Aug.2018 - 14:48]له شیخۍ راته بهتره شوه رندي بیا
ناصحان مې دې په سل رنګه غندي بیا
.
ښه چې خلاص شوم د ریا له تشه زهده
خدای دې رانهٔ کړه دا هسې خود پسندي بیا
.
د خلوت له عزیزانو مې زړه بد شه
ځان مې وشماره د تورکو په کندي بیا
.
چې مې کور په دغه تور دی مینې سؤی
وبه نهٔ کړم له تقوا سره ګوندي بیا
.
وابهٔ نهٔ ړوم نور مخ له ساده رویو
که د خط اره مې کېږدي په تندي بیا
.
له بېخونده آزادۍ شومه د سروې
د ګني په څېر په څو بنده بندي بیا
.
چې یې زه په ړومبي پند پورې خندا کړم
ناصحان په نصیحت کا ریشخندي بیا
.
دا د عشق طاغوتي رنځ به یې ارمان شي
که د زهد ځان کوټلای شي ژوندي بیا
.
د ګوندۍ زړه ترېنه صبر کړه ناصحه
له رندۍ سره حمید شه سوګندي بیا
.
.
رندي/ رندۍ = ۱) شراب څښنه ۲) د عمومي (ګرده) او ټولنیز دود دستور (هڅوب) مراعات (مخکته، لحاظ) نه کؤنه
غندي = لکه غندل، ترټل، رټل، مذمت کول، بد ورته ويل
ریا = ځانښوونه، خودنماني
زهد = پاليالی، تقوا، پرهېزګاري، ځان ساتنه، پرهېز
خود پسندي = خپل خوښي
خلوت = ۱) ګوښه کېدنه، ګوښه ګېري، ځان ته کېدنه، ځانته والی ۲) ګوښی ځای، هغه ځای چې بل څوک په کې نه وي
تورک = له تورک توکم (قام) وګړی، تورکي
کندی = کورنۍ، پلرینه
ګوندي/ ګوندۍ = ۱) پارټي بازي، ډله بازي ۲) د ګوند غړی، حزبي
ساده روی = هغه چې ږیره نه لري
پند = نصیحت
ریشخندي = ملنډې، په غوږوهنه، پېغور
طاغوتي = شیطاني
کوټل = ۱) دربل، د درانه شي په وسيله نور شيان کېمنډل ۲) ټکول، قيمه کول ۳) کوتره کول
سوګند = لوړه، قسم، حلف، ژمنه
. عبدالحمید مومند بابا