Adab au Hunar / شعر، ادب او هنر
د لمر غروب
[14.Aug.2020 - 14:47]د لمر غروب
سلیمان لایق .
ګوره ډوبېدونکی لمر به تور ماښام ته څه وایي
دا له زرو جوړ باچا، زنګي غلام ته څه وایي
.
بیا په بدمستۍ کې د الله حرم ته ننووت
سور مومن د دې جومات منکر امام ته څه وایي
.
زموږ شهید په جګو سترګو سرې پانسۍ ته وخندل
ګوره د تاریخ قاضي به دې انجام ته څه وایي
.
وینو د نجیب د شپې په تورو څڼو وشیندل
عطر د منصور، خدایه لا دې مقام ته څه وایي
.
تږی و، عاشق و، بې پروا یې په سر واړول
وپوښتئ سقراط چې دې د زهرو جام ته څه وایي
.
زموږ کابل په سپینه ورځ یو سور حمام د وینو شو
اوس سپینې کوترې دې خوني حمام ته څه وایي
.
نن یې له ډولۍ نه تکه توره ناوې کوزه شوه
اوس به دا د حورو زومان ټول اسلام ته څه وایي
.
بیا یې د حرم مارغه ته ږیره لومه لومه کړه
ګوره د مکې صیادان دغه دام ته څه وایي
.
تور پنجاب یې راووست د کابل په زړه یې کښېناوه
اوس به د جومات حرامي دې انجام ته څه وایي
..
زنګی = تور پوستی