زما په اند افغانستان د افغانانو نه پټ او محرم دی ځکه چې مونږ د خپل ملک په حالاتو خبر نه یو. استخباراتي لوبي همداسي دي چې خپله خبره درته ستا په خوله درکوي او بیا مونږ په هغه خبرو شخوند وهو او داسی فکر کوو چې ګوندې مونږ خپلی خبری پخپله کوو. د استخباراتو یوه مسله دا ده چې د افغانستان متهد او زړه سواندې خلک څنګه بدنامه کړي، په ولس او هم حکومت کې داسې بی اعتمادی په یو بل پیدا کړي چې سړی حتی په خپل ځان هم مشکوک شي او د همکاری، اعتماد او تفاهم فضا له منځه یوسي تر څو د استخباراتي شبکو لپاره د فعالیت زمینه همیشه مساعده وي. زما سوال دا دی چې ایا هغه کسان چې مونږ یې د نومونو سره اشنا یو، په دوی کې داسی کس پیدا کولې شي چې په دی نظام کې پري په تیرو پنځلس کلونو کې د جاسوس ټاپي نه وي لږیدلي.

همدا علت دی چې د حکومت په دننه او هم د حکومت نه بهر داسې محور نه شي جوړیدي چې افغانان پري راټول شي او یا په حکومت کې دننه یو قوی ټیم رامنځته شي. زما په اند مونږ استخباراتی جګړه نه شو ګټلي خو که مونږ خپله تګ لاره سمه ونیوله او ولس مو په خپل اعتماد کې واخست نو بیا د استخباراتي لوبو مخه نیولی شو. د استخباراتی لوبو مخه یوازی ولس نیولی شي نه زمونږ موجوده استخباراتی او امنیتي اداری.