غب غب يا
[06.May.2016 - 20:23]سعد الله جان برق
ډاکټر اسرار له دې خدائے د هرې مشاعرې او هر تقريب د صدارت سعادت ورکړى يوه ډېره اهمه مسئله يې راپورته کړې ده او دا يې زبردست کار ځکه کړے دے چې د غب غب دا مسئله نن صبا تقريباً په هر ځائے کښې موجوده ده، صرف موجوده نه بلکه ملک يې په مخه کړے دے. ما نه هم اکثر خلق تپوس اوکړى.
په لغاتو او ډکشنرو کښې خو چې څۀ وو هغه ډاکټر صېب بيان کړل خو تاسو ته بلکه ډاکټر اسرار ته او نور بعضې خلقو ته پته ده چې زۀ هم د خپل دور کوثر غوريا خېل يم هر ټکى ته د پښتو په چشمو کښې ګورم. يو بل کس هم وۀ خو نوم يې ما نه اوس هېر دے هغۀ چرته په يوه مجله کښې مضمون ليکلے وۀ چې دا د بو سنيا په ترخ کښې کومه "هر زګووينا" ده دا د پښتو ټکے دے مطلب يې دے "هر ځائے ګبينه" او دا خلق د سوات نه تلى وو هلته يې چې د شاتو د مچو ډېر ګبينونه اوليدل نو وئيل يې دلته خو هر ځائے ګبينه دے د هغې نه بيا هرزګوينا جوړه شوه.
کوثر صېب يو ځل په اباسين آرټ کونسل کښې تقرير کولو نو وئيل يې چې دا "پېښور" په اصل کښې " په ښى ور" دے او ځکه دے چې "خېبر" په اصل کښې "ښے ور" يعنې "دايان دروازه" ده کيڼه يا ګسه دروازه د باجوړ ده د" ښى ور" نه بيا "خېبر" جوړ شو ځکه چې هلته په عربو کښې هم يو خېبر نومې ځائے شته نو خلقو له يې ډېره مزه ورکړه او "ښے ور" يې "خېبر" کړو ځکه واؤ اکثر په ب بدلېږى لکه آب دست نه اودس عبدل نه اودل وغېره.
او د پېښور ښار د ښى ور په خوله کښې پروت دے نو په ښى ور شو يعنې هغه ښار چې په ښى ور پروت دے.
هغه ورځ نه ما هم ملا اوتړله او داسې ډېر الفاظ چې اغيارو پرې دعوى لرله د پښتو ملکيت کړل لکه لارۍ هغه چې په لاره ځى ،سبزى چې په تجارت کښې يې "سب ځى" تلکارى چې تل به پکښې کار کوے.
يوه ورځ يار محمد مغموم په نشتر هال کښې يوه مقاله پېش کوله چې دا "مرغه" ټکے مرغه (MARGHA) نۀ دے بلکه مرغه (MARGHA) دے زۀ او حنيف خليل چې بهر راوتو نو هغۀ راته اووئيل چې د دې مرغه په باره کښې ستاسو څۀ خيال دے ورته مې وئيل زما هم هغه خيال دے کوم چې کۀ کوثر صېب يا قاضى عبدالحليم ژوندى وې نو د هغوى به وۀ دا ټکے نۀ مرغه دے او نه مَرغَه بلکه د کتابت غلطى پکښې شوې ده ګنى اصل ټکے "برخه" دے کومه چې مونږ د قسمت نصيب او تقدير دپاره استعمالوو يعنې د بدې برخې يا ښې برخې نه د بده مرغه يا ښه مرغه جوړ شوے دے.
اوس دا د غب غب ټکے هم څۀ دا قسمه شان نزول لرى د کوثرى او افغانى نظره چې ورته زۀ ګورم نو دا ټکے په اصل کښې غپ غپ دے خو تاسو ته خو پته ده چې عربان پ نۀ شى وئيلې . پاکستان ته باکستان وائى شيمپو تا شامبو وائى .پروېز مشرف ته به يې برويز مشرف وئيل د دې ثبوت دا دے عربيان اکثر نورو خلقو ته چاړيان وائى او دا قاعده ده چې ليونى دنيا ته ليونى وائى. خېر د عربو په باره کښې نور څۀ نۀ واېم ځکه چې ډېر ښۀ خلق پکښې تېر شوى دى. د هغه ټولو د مخه دې حيا وى، کۀ دغه انبياء، اولياء ترې بهر کړې نو عرب ..؟ بلکه دا هم ثبوت دے هم ما ته يو ځل يو سړى اووئيل چې د عربو نه راغلے وۀ وئيل زۀ حېران يم چې خدائے پاک په دې عربو کښې څۀ ليدلى اول پرې د اسمانه نعمتونه ورېدل او اوس پرې د زمکې نه. ما ورته ووئيل په کور کښې مو کوم ماشوم د ټولو نه زيات ورانکارے وى نو مور پلار ورله هر څۀ ورکوى چې شر جوړ نۀ کړى. خېر نو خبره دا ده چې غب غب خالص پښتو ټکے دے چې عربو زمونږ نه پټ کړے او بيا يې معرب کړے دے ځکه چې کۀ انسان وى کۀ چېلے وى او کۀ بل ځناور کله چې څۀ خورى يا وائى نو لاندينى ژامه يا زنه يې متحرک شى يا د زنې د متحرک کېدو نه چې کوم اواز راوځى د دې خبرې تقويه په دې هم کېږى چې ګپ ګپه هم د زنې د تحرک باعث کېږى نو کېدې شى چې د غب غب ټکے په اصل کښې ګپ ګپ وى يا د ګپې يا ګپ سره يې تعلق دے . د داسې ټولو حرکاتو سره پورته ژامنه نۀ خوزى بلکه لاندينې ژامه چې په قريب وجود کښې يې زنه هم پرته ده خوزى او کۀ څوک څورب وى نو د هغۀ ورسره د زنې لاندې غوښه هم خوزى او کۀ ښکلے وى نو د ښکلو خو بيا هر څۀ ښکلى وى.!