Adab au Hunar / شعر، ادب او هنر
ځواب
[05.Jan.2022 - 10:57]ځواب
د ارواښاد صاحب شاه کلیات
مخ - ۱۸۷
.
زه کله د الفت د میکدو لېونی نه وم
زه کله د ښایست د رنګینو لېونی نه وم
.
زه کله د الفت د عظمتونو نه منکر وم
زه کله د ښایست د کمالونو نه منکر وم
.
ما کله په زخمونو کښې سپرلي نه دي ستایلي
ما کله پرهرونه په اغزو نه دي ګنډلي
.
ما کله د ګلونو د یارۍ نه توبه کړې
ما کله د رنګونو رڼا نه ده نغمه کړې
.
زما په برخه کله لېوني غمونه نه وو
زما په لمن کله د تومت داغونه نه وو
.
زه کله باغي نه ومه، خودسره مین نه وم
زه کله، زما ګرانه، د زړه سره، مین نه وم
.
زه تل د محبت د عظمتونو ثناخوان یم
زه ټول عمر په دې ګناه له ژبې اوېزان یم
.
زه نن هم، د پرون غوندې، په دې ګناه لټاړ یم
زه نن هم، د فتوو، د توپو مخې ته ولاړ یم
.
زه نن هم د پسرلي هره ښکالو نغمه کومه
زه نن هم زندګي د محبت په تار تړمه
.
زما زړه خو هم هغه دی چې تا ته مې ښودلی
زما لېونتوب هغه دی چې تا خپله لیدلی
.
خو زه د دغو ټولو حادثو سره بلد یم
د ځان د سوځېدو د تماشو سره بلد یم
.
ما ټول عمر هم دا کړي، دا اوس چې څه کومه
همدغسې پخوا ومه، دا اوس چې څنګه یمه
.
زما ژوند خو همغسې بې سره لېونتوب دی
زما سترګو کښې هغسې یو غلی غلی خوب دی
.
که ته د نعمتونو د تیارو نه وېرېدلې
که ته د دې خبرو دغو خولو نه وېرېدلې
.
که دغه بوږنوونکې وېرې ترهې دې په زړه وې
تر اوسه ولې چوپ وې، د زړه سره څه دې نه وې
.
اوس څه وشو چې داسې وېرېدلې یې، اوتر یې
ما هم وېرول غواړې، لېونی یې، زورور یې
.
زه څه وکړم، ستا ومنم، له ژونده لاس په سر شم
د مینې نه توبه کړمه، د مینې نه منکر شم
.
نهٔ، نهٔ، زما نه، نهٔ کېږي، دا نهٔ کېږي، دا نهٔ شي
زما لمن دې چېرې په دروغو پاکه نهٔ شي
.
زما زړه دې د مینې د عظمت په ګناه تور وي
زما په نوم دې دغسې یو سل الزامه نور وي
.
ته ځه، ورځه چې تا ته په کښې پېښه نوره نه شي
زما په الزامونو دې لمنه توره نه شي
.
زما مینه خودسره ده، یاغي ده، تاواني ده
زما ژوند لا تر دې ورځې بایللې جواري ده
(غوړچان: ممتاز خان)