خط مې راغلی د جانان دی
[20.Jul.2017 - 13:57]خط مې راغلی د جانان دی
لیک: ثناء الله شميم ګنډه پور
د امامانو په مياشت کښې نن صبا سړی هسې هم له ويرې نه د کوره نه اوځى او بيا په اتمه ورځ هغه هم له ډېره اسماعيل خان نه تر پېښور پورې په يو نۀ ختميدونکى اوږد سفر تل د سړى اينه رژوى .خو د کوز دير يو ډېر ګران او خوږ ملګرى داسې په مينه او اخلاص بلنه د مشاعرې راکړې وه چې انکار ته مې خلۀ نۀ جوړېده او بيا ورسره د ګران مشر سليم راز صېب تاکيدى حکم هم وۀ چې ارو مرو ځان رارسوه بس بيا خو د معافۍ ورونه بيخى بند شو کنه. سحر مې زړۀ کښې وې يا الله خېر راپېښ کړی او ورسره د پېښور په لور روان شوم ،ځائی په ځائی د پوليس او د فوځيانو په چوکيو د سر نه پښو پورې تلاشى او د هغوى د ګاډي لاندې باندې کتنې سره درې نيمې بجې ماسپښين ډبګرۍ ګيټ ته ورسېدم او د هغه ځائی نه سليم راز صېب او غزوال صېب او فريدون خان په ملګرتيا کښې د کوز دير په لور مو سفر پيل کړو ،سليم راز صېب پروفېسر محمد اسلام ارمانى صېب ته په لاره ټيلى فون وکړو چې مونږ اله ډهنډ ډېرۍ ته درروان يو او شپه به مو له تا سره وى چې کله ملاکنډ نه ماښام تيارۀ اله ډهنډ ډېرۍ ته د پروفېسر ارمانى صېب حجرې ته لاړو، پروفېسر ارمانى صېب د مخکښې نه زمونږ په انتظار ناست وۀ ډېر زيات خوشحاله شو ،د ارمانى صېب د حجرې په يوه لويه کوټه کښې د ټول ژوند سرمايه ښۀ ډېر کتابونه او بيخى زيات ايوارډونه چې وخت په وخت ورته د خدماتو په بدل کښې ورکړى شوى دى پراتۀ وو. ارمانى صېب زمونږ ډېر زيا ت خدمت وکړۀ الله دې اجر ورکړى امين. خدائی دې هر چا ته دغسې مشران ورکړى چې پروفېسر ارمانى صېب غوندې قدرمن هم وى او مينه ناک هم .کۀ څوک پښتو+ پښتون او مينه يو ځائی ليدل غواړ ى نو هغه دې راشى او پروفېسر محمد اسلام ارمانى صېب دې وګورى په هغۀ کښې دغه درې واړه خوبۍ موجودې دى. لنډه دا چې ارمانى صېب ټول مينه مينه دی. ډېر بختور انسان دی ما چې په کتابونو کښې د کومو پخوانو پښتنو مشرانو په حقله د هغوى د قدر اخلاص د کشرانو سره د مينې د پښتو غېرت په حقله چې څۀ هم لوستى وو هغه مې د پروفېسر محمد اسلام ارمانى صېب په شکل کښې په خپلو سترګو وليدل او وکتل . نن سبا په هر يو کلى کښې د ارمانى صېب غوندې د دروند پښتون اوسېدل د وخت تقاضا ده. ارمانى صېب سره ټوله شپه پښتو ادب او په شاعرۍ خبرې کېدې هغۀ خپل زاړۀ يادونه تازه کړل ډېرې خوندورې خبرې او تبصرې وشوې. ډېر څۀ مو ترې زده کړل ،ارمانى صېب ټول ژوند د پښتو ژبې او ادب خدمت کړی دی او د دوى نوم په هر هغه ځائی کښې چې چرته پښتو ژبه وئيلې کېږى لوستې او ليکلې کيږى، معرفى دی او کۀ زۀ دا ووايم چې د پروفېسر محمد اسلام ارمانى صېب په نوم د پښتو شعر و ادب په تاج کښې لکه د کوه نور ځلېږى نو غلط به نۀ وى. سحر چې کله مونږ کوز دير ته تلو نو ارمانى صېب د خپلو کتابونو يو سيټ راته ډالۍ کړو نور کتابونه خو ټول شعرى زيار وو او رښتيا خبره دا ده چې د پروفېسر ارمانى صېب په شعر زما غوندې کم علمه انسان ته ډېر ګرانه ده چې څۀ تبصره به اوکړم خو يو کتاب "خط مې راغلی د جانان دی "يادګار خطونه او بلنې زما په نوم" يو ځانګړی حيثيت لري. د شاعرۍ نه يې ما ډېر خوند واخستو خو دې کتاب په ليدو او لوستو زۀ د فکر په اس کښېناستم او ښۀ مې ګړندې وزغلولو او بيا په نتيجه ورسېدم چې خطونه خو يو روايت دی چې د پخوا راسې خوندى کولې او چاپ کېږى هم خو دا بلنې نن پورې نۀ چا خوندي کړي او نۀ چاپ کړى دى او کۀ چرته داسې شوى دى نو بيا زۀ نۀ يم خبر. پروفېسر ارمانى صېب کتاب ته نوم هم ډېر خوندور ټاکلی . دا د يوې اولسى سندرې مصرعه ده او ډېره په زړۀ پورې او ښائسته مصرعه ده ، کتاب 144 پاڼې لرى خو پاڼه 254 نه پکښې څۀ تکرار راغلی دی او بيا پاڼه 239 پيل شى خو دا د کتاب په پاڼو کښې بې ترتيبى ده دا کتاب چې څوک به هم لولى نو د فکر په سمندر کښې به ډوب شى ځکه چې دا د نيمې پېړۍ ادبى تاريخ او يو مستند دستاويز دی او دومره حده دا ښکلې او ادبى ملغلرې سنبال ساتل څۀ ټوقې خو نۀ دي. دا کار د ارمانى صېب مشر او مستقل مزاج انسان هم کولی شى دا دومره ښکلې او په زړۀ پورې بلنې دي چې د سړى زړۀ ورته په ټوپونو شي ځکه چې دغو بلنو کښې د داسې مشرانو شاعرانو اديبانو نومونه د مشر مېلمه او د صدارت په چوکۍ ليکلى دى چې مونږ يې محض نومونه اوريدلى او کتابونه مو لوستلى دي. په ځانګړو موضوعاتو پروګرامونه شوى او د هغو پروګرامونو موضوعات د عقل ورونه خلاصوى. چې کله سړی دا بلنې لولى نو نېغ هغه وخت ته لاړ شى او د هغو مشرانو سره په محفل کښې ځان ناست شماري او دغه د دې بلنو برکت او خوند دی_
په کتاب سريزه نوموړي ليکوال رحيم شاه رحيم صېب د "يادګار خطونه" په سر خط ليکلې ده او زۀ يقين لرم چې چا هم دا لوستې دى نو په کتاب د صاحب کتاب د خطونو او د بلنو پر موضوعاتو به يې سترګې خلاصې شوې وي. د خطونو ليکلو يو تاريخ دی خط ليکل يو فن دی او خطونه ليکل اوس د ادب برخه ګرځېد لې ده خو د بلنو يو ځائی کول او بيا په دومره ښکلى انداز چاپ کول ځان ته يو ځانګړی قدم دی. او د بلنو چاپ کۀ نن نۀ وي نو صبا ته به کۀ خېر وى د ادب برخه ګرځولې کېږى او د دې سرخېل به پروفېسر ارمانى صېب وي. په کتاب کښې چاپ شوى ټول خطونه ادبى دى او ځنو خطونو کښې خو داسې ادبى مسئلې چيړلې شوي دى چې انسان ورته حريان دريان پاتی شى او د هغو مسئلو نن هم ضرورت دی چې خبرې ورباندې وشى .ما په ذاتى طور باندې له دې کتاب ځنې د رڼا اخستلو هڅه کړې او دا کتاب لوستلو سره زما غوندې کم علمه سړي ته رڼا بخښى .لنډه دا چې هر يو شاعر اديب ته دا کتاب لوستل پکار دى او دغسې د پروفېسر ارمانى صېب غوندې ادبى بلنې يو ځائی کول او چاپ کول د دوى وظيفه ګرځېدل پکار دى. چې د نن زيار د سبا تاريخ خوندې کړی شى زۀ پروفېسر ارمانى صېب ته په دومره ښکلى کتاب چاپ کولو امبارکى ورکوم (پاڅون / مردان)