Adab au Hunar / شعر، ادب او هنر
غزل
[02.May.2022 - 12:32]درده زړه چاودنې ته مې وګوره
ځار دې شم لمنې ته مې وګوره
.
کله مې ماغزه او کله زړه څکونډي
دې د فکر غنې ته مې وګوره
.
لاس یې کړه جوړه، سترګې جرګه جرګه
وې ویل چې زنې ته مې وګوره
.
ستوری ستوری کېږي خوا له نه راځي
دې د خیال مېرمنې ته مې وګوره
.
نه لګوي خوله د اننګو په اور
تندې کبرجنې ته مې وګوره
.
ستا قد د اینځر زه د چینار قامت
سیاله لږ خو ونې ته مې وګوره
( اکبر سیال)
.
له = لره
څکونډل = ۱) ټونګرېيل، نوکارې کول ۲) چیچل
ونه = قد، لوړه، جګه، جګواله، لوړوالی، زانګه، زانګۍ
قامت = ونه، قد، تنه، دړه
(غوړچان: ممتازخان)