Adab au Hunar / شعر، ادب او هنر
غزل
[13.Mar.2025 - 10:47]
غزل : خان بهادر خيال
تل داسې خانده د خندا سلسلې ماتې نه کړې
ټوټې زړګې مې پرې راټول دې ټوټې ماتې نه کړې
د ښکلي مخ ګلان يې ؤړم د سباؤن غاړې له
د درنو سترګو حوصلې شوګيرې ماتې نه کړې
د تن سختۍ هسې نه بار مې شې د زړه په دنيا
زما له ژونده سره کړې وعدې ماتې نه کړې
څو چې پراته وي د کاسو په مخ سپېره ګردونه
په يؤ څو څاڅکو د عمرونو توبې ماتې نه کړې
پکښې پرتې دي د سپين مخو سحرونو قيصې
د خړو څلو خړې پړې ډيوې ماتې نه کړې
يؤ ځل ورذده که شو سبب د لېونو د اتڼ
ګوره که بيا پکښې شیخانو اوګې ماتې نه کړې
د ژوندون ناوې چې په شړنګ يې تخنوې زخمونه
ګورې بې وخته دا سازګرې ګجرې ماتې نه کړې
چې په ګډا يې کړلې ستا د در خاموشه کوڅې
د خيال د مست نظر ګلګونې نشې ماتې نه کړې
انتخاب سنګر Khan Bahadar Khyal