شريکوم دې . په دې خپلو حيرانيو کښي نن
که آيينه درته ډالۍ کړم .اجازت دے ؟ دوسته

تا په دې حقله څه او نه وييل .تر اوسه پورې
کليوال در په در او کلے سلامت دے .دوسته

ممتاز که تا ته ولې وايي . نو څه ګړم خو نه دے
شنۀ کاڼې اوري او د ستا سر سلامت دے،دوسته

زۀ هم پري نښوم ظالمانو تر جيحاتو بيخې
تۀ هم له مانه لکه کړي اراده پاتې شوې

چې يې سايه درباندي او نه شوه. بلا سړے بې
ګنې ښه ډير د ښامارانو همسايه پاتې شوې

ممتازه تا کړي غږونه تا ته نه رسيږي
د ذات په کومه منجمده جزيره پاتې شوې

تقديره دويي روا نه بولي ستا په حقله بحث
او ماسره شکونه او سوالونه دي بيا هم

ښه ، ښه . بس هم دا لار د بغاوت ده . کنه يار
لښکر يارانو پريښوم بدرګه نه کړم چا هم

ممتازه ته په داسې ځاے ولاړ يې نن سبا
چې بل ځاے به د ناستې پاتې نه شي د ستا هم

ته خو خاموش وې کنه ،رنګ دې غږيدو لاليه
دا درته چا وييل چې داسې ترجمان هم ساته

لا راته مه وايه چې داسي بې طرفه اوسه
لا راته مه وايه چي ګير چاپير ياران هم ساته

تعمير پرست ممتازه مه باييله افسون د کنډر
په مخ مسکا خوره ساته .خو زړګے وران هم ساته

په دي يو خويي کښي بي شکه درشريک يم
چي د هر مزاج د ښې نه يم غزله

هر وخت راشه . خو له کربه سره راشه
زه په ورځې او په شپې نه يم غزله

په رنګينې کتابچې کښې مې ميلمه کړې
ممتاز داسې بې حجرې نه يم غزله

که هيڅ درته ګران نه دي، نو بيا دا هم دا ممکنه
په دي دنيا جنت کړه زما سيمه ، لا يزاله

په ما روان ستم به کله مومي . انتها؟
د ستا کرم به کله وي ؟ کريمه لا يزاله

هغه ا زار وهلے هيڅ خبر نه وو رحيمه
ممتاز يې ډارولو له جحيمه لا يزاله

د بغاوت ګناه کښې ټول ملګري ياد ساتمه
لږ ډير دي دويي هم بي ثوابه شي. او زه دي هم شم

لا خو دې هر څه د حساب له دايرې نه اوځي
لا خو دي هر څه بې حسابه شي ، او زه دې هم شم

ممتازه کاش چې د بي آبه اميد دور تير شي
خلق دي تير له دي سرابه شي، او زه دي هم شم

د زمکې په هغه حصه اباد يوو چې تر اوسه
مونږ هر څه ته کتلي په چشمو کښي د اسمان دي

هر چا د خپل مکان دروازه بنده کړه له ډاره
په دي ماحول کښې څو دروازې خلاصې د امکان دي؟

ممتازه د ټپې غوندې ټپي .ټپي . اوسيږه
قربان دې شمه . دلته کښي اوس څوک د ياقربان دي؟

هر غم خوندونه اخلي . هر ساعت له يو مغمومه
هر وهم خامخا ساتي ، يوه فضا موهومه

اشنا مې يې له نومه، او اشنا دې يم له نومه
زما او ستا تر مينځ اخر رشته ده بله کومه؟

ممتازه، زه جدا شومه اخر هم له هجومه
ممتازه . لاس په سر شوم له لازم او له ملزومه

زما تنده د اوسپنې کوټه . بې دريڅې ده
نور اور اخلم چې څومره باران، اوري، اوري ، اوري

دا ژوند دې يوه سترګه شي چې څو پورې غړيږي
بس حسن ته دې ،ګوري ،ګوري ، ګوري ، ګوري ،ګوري

ممتازه! د معنې يو خپل جهان هم لرل غواړي
ګني نو کتابونه څه دي؟ توري ، توري ، توري

زه ښکته ګورمه چې زمکه مې د پښو نه تښتي
تۀ پورته ګورې چې اسمان خو سلامت پاتے دے

نه ما ته مه کوه قصه . چې وحشت څۀ ،څه اوکړل
نه آورم نه،چې ستا ګريوان خو سلامت پاتے دے
ممتازه دويي چې د سندرې په مرګ وير کوي .نو
بلا وهليو خوږ اذان خو سلامت پاتے دے

پوره خبره دې نه سيوا څه اوکړم لالا؟
چې خپله برخه هم تر نيمايي ده را په برخه

هو ، هو ، زما به زړۀ تياره کښې ډوب شو ،خو اوس نه
د تورو تورو ټکو رڼايې ده را په برخه

د هر سړي د زرۀ ساتل ممتازه اسان نه دي
درواخله خدايه .دا کومه خدايي ده را په برخه

ستا رنګ؟؟ لکه ګډ شي مازيګر سره ماښام
اوس د تلونکي لمر که د ډيوو غوندې درجار شم

راشه چې دې خال د نظر ماتي په رخسار شم
راشه ، راشه ، راشه، د رنجو غوندې درجار شم

څوک چې له چا لو لپه جار شوي په دنيا وي
جار شم ،جارشم، جارشم، د هغو غوندې درجار شم

اوس خو د ممتاز په مخ دوه سترګې يې لاليه
اوس نه يمه ګرم که د بڼو غوندې درجار شم

زه ځمه . خو زما لورے معلوم نه دے .اشنا
يم ورک د ورکو لارو په نشې، راځه که ځې

چې څومره بليدے شوم ، دومره وې راسره ته
اوس دود شومه د خپل ځان د ډيوې ،راځه که ځې

په غاړه د ممتاز د بې نيازۍ ګوره کچکول
پريږده، دا ډاډګيرنې ، حوصلي. راځه که ځې

چې راغلې نڅيدم لکه لوګے د سپيلنو
په تلو دې چې ما او واهۀ ټټر خوند يې کاوۀ

زما قصه به بيا شې . اول تۀ خبره اوکړه
چې تا قينچې کول زما وزر خوند يې کاوۀ؟؟؟

ممتازه که دا وايم . کافر کيږم خو به نه؟؟
خليله! سپکاوۀ چې دې آذر خوند يې کاوۀ؟؟؟؟؟؟؟

د هر ګوټ قدم چې اخلم نو خمار شي
رانه زيات چې څو قدمه شي نو ته شې

چې چاپير ترې دا عالم شي. هغه زه شم
چې چاپير څوک له عالمه شي ،نو ته شې

زه ممتاز که د هر چا تصوير ته ګورم
خو چې سترګې مې پرنمه شي نو ته شې

مونږ عجيبه خلق يوو. هر څوک په سر او خيژوو
مونږ په لوګي هم نامه کيږدو د اسمان لاليه

ما دي يو سل ځله کافر کړي. خو په خداے مي قسم
که سرګردان هجوم ته او وايم .کاروان لاليه

ممتازه. ولې نه شوم ګونګ. چې مې وييل ورته .دا
ښايست دي چرته په شنه منډه دے روان لاليه

انکاره ! دي تر داره رسيدۀ مخالفت
ګويا دي کتابونه ستايش کښې د جنت

تمام رياضتونه دايره کښي د ګمان
تمام عبادتونه ازمايش کښي د جنت

ممتازه جنسي لوږه مقدسه شوه .که نه؟
د حورو دومره ذکر نمايش کښې د جنت؟؟

هر يو مثال له حقيقته خالي
حقيقتونه په مثال کښې ژوندي

صاحبه! مونږه د تير کال مړي يوو
ګرځوو لا اوس هم په دې کال کښې ژوندي

ممتازه څه د تجربو دوران کښي
ساه اخلوو اوسوو قيل او قال کښي ژوندي

هغه زمونږه د ر ضا حيثيت څه پيژني؟؟؟
بس اودروي زمونږ تر مينځه لونګينه ګناه

هلته د ساه د اخستو اذيت څه ته وايي؟؟
چرته چې وينه شي ثواب، چرته چې وينه ګناه

ممتازه هر يو عبادت د تعظيمونو وړ دے
خو دا يوه نيمه ګناه هم وي نيازبينه ګناه

ما د غر هومره درانه ورته کتلي
خلقو ډير وييل چې سير هم نه دے پاو دے

د ارام دا مسلسل غوښتنه څۀ ده؟؟
وا صاحبه! دا هم هغه زوړ کړاو دے

زه يې تړه کښې زرغون يمه ساتلے
که تړون مې دے ممتازه ، که تړاو دے

د چا څه کار؟څۀ يې روزګار؟دومره به هم وي څوک اوزګار؟
چې راسپړي زما ژوندون ،زما قامت ،زما قيمت

ناپ دے دکومې پيمانې؟ تول دے د کومې زمانې؟
برخه د کوم يوۀ قانون؟ زما قامت زما قيمت

ممتازه بس په دې اميد. ممتازه بس په دې آسرې
چې به اشنا شي د بدلون .زما قامت زما قيمت

-----------------------------------------