Adab au Hunar / شعر، ادب او هنر
خوشال بابا ته
[19.Oct.2017 - 18:05]ستا له غیرته ډک دیوان نه شم قربان خټکه
یوځل خو بیاراشه دونیا ته خوشال خټکه
یوځل خوراشه دپښتون دحال پوښتنه وکړه
فخر افغان سره ملګری شه پالنه وکړه
دچارسدې دیتیمانو ډاډ ګیرنه وکړه
وکړه تپوس له غیرت ګل او صمدخان خټکه
یوځلې راشه دا خپل مړاوی ګلستان وګوره
دبل له لاسه در په در خپل عزیزان وګوره
په مردکو سوری سوری دخدای قرآن وګوره
دویم اورنګ راغلی ستا په خاندان خټکه
ستا پښتانه ځانته ازاد پښتو نستان غواړي
دغلامۍ او بدنامۍ ځینې امان غواړي
دغه کار ستا په شان ټینګ عزم ټینګ ایمان غواړي
کاشکې پیداشي نور خانان داستا په شان خټکه
بیا خړې وریځې نن په غرو دپښتونخوا وینمه
دپښتنو دژوند او مرګ سود او سودا وینمه
ستا په وطن دعلیمانو تیری بیا وینمه
ځکه نارې سورې وهم زه ملنګ جان خټکه