Adab au Hunar / شعر، ادب او هنر
مرد
[07.Nov.2020 - 16:36]د خوشال بابا کلیات
مخ - ۴۵
.
مرد به نه شې په ګفتار
څو پیدا نه کړې کردار
.
چې دې وښکنځي، مرد نه یې
که له تا نه وي په ډار
.
چې څه دی خو انتقام دی
د مردانو کار او بار
.
عفوه هورته ځای لرینه
چې نه عیب وي، نه عار
.
چې عزت ورڅخه نه وي
هغه مرد نه دی په کار
.
هم مهره لري، هم زهر
ښه مردان دي لکه مار
.
چې هم تندر، هم باران دي
تر هغو مردانو ځار
.
مرد به غم د خپل هنر کا
نه د زر، نه د دینار
.
مرد به غم کا د خپل شرم
د عزت، د اعتبار
.
نامرد فخر په نسب کا
مرد نه مور لري، نه پلار
.
د خوشال خبرې ګوره
لال او دُر پېیي په تار
.
.
وښکنځي = لکه کنځله کړي
انتقام = غچ، بدل = Revenge
عفوه = تېرېدنه، بخښنه، بښنه = Forgiveness, pardon, absolution, amnesty
عیب = ویار، نیمګړتیا = Fault, flaw, defect
عار = ۱) شرم ۲) پېغور ۳) عیب = Shame, disgrace, disdain
مهره = د زهرو اثر ختموونکی يو ډول دارو، زهرمهره، تریاق، تریاک = Antidote
لال = لعل، یو ډول سور رنګ ګران بیه غمی = Ruby
دُر = ملغلره، مرغلره = Pearl
پېیل = په تار کې راغونډول = To string, to thread, to put beads on a string
.راټولونه او خوښونه: ډاکتر ممتاز خان