Adab au Hunar / شعر، ادب او هنر
غزل
[12.Apr.2022 - 15:44]غزل
تا سره ګلاب ښه دے
ما سره رباب ښه دے
روستو چې پرې جنګ کوو
مخکښې نه حساب ښه دے
زمکې! چې سېزل کوې
تانه خو درياب ښه دے
سوال به زما بد وي خو
ستا نو کوم جواب ښه دے
کړے يې ارمان د جنګ
ښه دے په عذاب ښه دے
ستاسو په پښتو څه کار؟
تاسو له پنجاب ښه دے
ما له دې څه نه راؤړي
ورور مې دے کامياب ښه دے
پرېږده طمانچه ځويه!
سکول ته ځه کتاب ښه دے
هر څنګه چې دے اقبال
تا پسې خراب ښه دے
اقبال مومند
Iqbal Momand