Adab au Hunar / شعر، ادب او هنر
دمشال خان
[14.Apr.2022 - 15:35]د مشال ماتې ګوتې
نن مې پر زړه اوري مشال، د مشال ماتې ګوتې
تړم د اوښکو په دسمال د مشال ماتې ګوتې
فخر افغانه! د "مردان د مارچ" دويم پړاؤ دی
ستا د پښتيو په مثال د مشال ماتې ګوتې
زموږ تاريخ، زموږ غېرت، زموږ اسلام او پښتو
د فرخندې شلېدلی شال، د مشال ماتې ګوتې
اوس به محفوظ وي د نبي آخر زمان تقدس؟
له موږه نن کوي دا سوال د مشال ماتې ګوتې
ستاسو پوره مسلماني په هر یو لاس کې کاڼي
ستاسو د ټول علم کمال د مشال ماتې ګوتې
لکه چې مات شي تسلسل د يوه قام د تهذيب
ماتې طبلې، مات سر و تال، د مشال ماتې ګوتې
يو لوی پېغور د مات بامیانو، بل د مات مېرانشاه
بل لوی پېغور زما په خيال د مشال ماتې ګوتې
توره قلم به دواړه مات کړي، دوباره به شي مړ
که چرته وليدې خوشال د مشال ماتې ګوتې
صوابيواله نجلۍ نن شوه غريو نيولې ځان ته
څوک به مې ږدي پر زنه خال؟ د مشال ماتې ګوتې
ملا به نه وئيل چې ټول مذهب دی امن امن؟
کړې يې په جشن استقبال د مشال ماتې ګوتې
نخښه د قام د بې حسۍ د مشال مات اسوېلي
ثبوت د قام د هر زوال د مشال ماتې ګوتې
هره ذره زخم، په هر زخم کې لاندې زخم
دي په زخمونو مالامال د مشال ماتې ګوتې
په ترحم به يې مرهم کوي، همدا يې چاره
د مور په زړه کې دې سمبال د مشال ماتې ګوتې
۱۳ اپرېل ۲۰۲۲
Khan Zaman Kakar خان زمان کاکړ