Adab au Hunar / شعر، ادب او هنر
داستا در به په
[10.Sep.2022 - 16:19]خيال مې نه شي که د ښې ورځې خاوند شم
چې ترڅو پورې ملا شته او منبر شته
****
په ما به هم سترګې راپټې کړي څوک
په ما به هم يو تن جنت ته لاړ شي
****
چې يې د سکول پر ځای ملا له لېږو
اخــــــلو د خپلو ماشومـــــــــانو ازار
يو کار که ډېر هم مقــــدس وي زياره
چې په خپل وخت نه وي نو نه دی پکار
****
که يو جنت ته هم ځو خو رښتيا خبره دا ده
زما لاره جدا ده او د ملا لاره جدا ده
چې خال یې د تندي نه شي نکريزې د لاسونو
دا ستا وينه ائ زړه نوره د کوم مرض دوا ده؟
له زوره که د زړه د ماتېدو چېرته خبر شوې
د سر په ماتېدو به شکر وباسې فرهاده
زاهده په جنت کې به پرانیستې تڼۍ ګرځم
تړلي مې ټول عمر د خوارانو سره ملا ده
(ډاکټر خالق زيار)
_______________________
دا ستا درد به په هزار درمان ورنکړم
دانسته به دغه سود په زیان ورنکړم
که څوک راکاندي دنیا او عقبا دواړه
عاشقي به دې په این او آن ورنکړم
معشوقې د عاشقانو دین ایمان دي
زه به چا لره خپل دین، ایمان ورنکړم
که یو ځلې مې ستا زلفی په لاس کښیوزي
یو ویښته به دې په درست جهان ورنکړم
که مې لاس چیرې دا ستا په بوسه بر شي
دا نعمت به د جنت په خوان ورنکړم
څو ونه وینم دا ستا سترګې که خدای کړه
عزرائیل له به تر هغې ځان ورنکړم
په رحمان دا ستا د لبو می حرام دي
څو د خپلو وینو جام تاوان ورنکړم
https://www.youtube.com/watch?v=1_g2A5sc8CQ&feature=youtu.be
___________________
بیا دې صحیح نکړم په هغو سترګو
یو ځلې هماغسې په مړو سترګو
خیردی که زما سترګې دې بدې شي
ته خو را ته ګوره په دا ښو سترګو
زه دې کړم آشنا دشو ګیرو سره
وړي مې خوبونه ستا اودو سترګو
تاته که زړې دي ماته نوې دي
کله خو راګوره په زړو سترګو
زه يم چې د زړه په سترګو تا وينم
چا رڼا ليدلې په ړندو سترګو
څومره ترېنه وږي دي حيران يمه
سترګې د خاطر ستا د مړو سترګو
(خاطر اپریدی)
https://www.youtube.com/watch?v=cpRP_BWgef0
____________
ښاغلي عظم الدین علیمي صیب یوخوندور شعرچې ارواښاد ملنګ جان ته یې ډالۍ کړی دی
د ملنګ جان د مړینې د ۵۹ تلین په مناسبت
عظم الدین علیمي
ملنګ خو ملنګ نه و یو حکیم و د ملت
ښکاره و ورتـه واړه لامـلـونـه د ذلـــت
********************************
ملنګ خو ملنګ نه و کړه یې پر زړونو پاچهي
افغان تـــه يـې غوښتله هـوسـايـي او سرلـوړي
پـه کـچـه د نــړۍ پـوهـه عـلـمـي او تخـنـیـکـي
ښـــه ســمـه بـرابـره لـه جـهـان سـره سـیـالـي
خـبـر و ملنګ جـان چې وطن ډک و له ثـروت
ملنګ خو ملنګ نه و یو حکیم و د ملت
ښکاره و ورته واړه لامــلـــونـــه د ذلت
***********************************
مـلـنـګ خـو مـلـنـګ نه و یو مین و ارماني
لـرلـیـد یـې شـوو وهـلـی مـنـزلـونـه جهاني
ده کـړلـې پـرتـلـنـې، ارزونــې انـسـانــــــي
غـنـدل يې بـد رسـمـونه رواجــونـه زماني
د غوره عنعناتو یې کړه ستاینه او صفت
ملنګ خو ملنګ نه و یو حکیم و د ملت
ښکاره و ورته واړه لامـلـونـــــه د ذلت
********************************
ملنګ خو ملنګ نه و پر هیواد مین مجنون و
د مینې سمندر کې و لاهو اصیل مفتون و
تقسیم د افغانانو ته زړه شینی جګرخون و
آمو نه تر اټکه کلک ولاړ په پيوستون و
غوښته یې د بابا د وخت بایللی شان شوکت
ملنګ خو ملنګ نه و یو حکیم و د ملت
ښکاره و ورته واړه لامـلـونـه د ذلت
******************************
ملنګ خو ملنګ نه و ضد د کرکې دوښمنۍ و
غمجن په افغانانو کې پر شتون د تـربګـنـۍ و
نـفـاق او نـالـوسـتـي ده ته اسباب د پسمانۍ و
خبر له ځمکې لانـــدې ډېــرې لـویې شتمنۍ و
شـاکـي و د خـوارانـو له خـوارۍ او بـد حالت
ملنګ خو ملنګ نه و یو حکیم و د ملت
ښکاره و ورته واړه لامــلــونـــه د ذلت
***********************************
ملنګ خو ملنګ نه و پـر رمـزونـو و خبر
د پـیـر پـر فـریـبـونـو طـلـسـمـونـو و خبر
مـریـد تـه یې پـه ټګو شان نیتونو و خبر
د شیخ او د ملا پـر څـه عییبونو و خبر
ویل يې ورته مه راولئ تاسو ژر قیامت
ملنګ خو ملنګ نه و یو حکیم و د ملت
ښکاره و ورتـه واړه لامـلـونــــه د ذلت
*********************************
بېرته شاته