Adab au Hunar / شعر، ادب او هنر
غزل
[15.Jul.2024 - 09:46]د خوشال بابا کلیات
مخ - ۷۷۴
.
په کاته کاته مې سترګې په خاته شي
چې خبر دې د راتلو راباندې وشي
.
ته خو اوس له ما نه لاړې، مرور شوې
دا زما یاري دې هم ګوندې په زړه شي
.
ګوره تا راباندې کومې کوډې وکړې
که په پښو درځنې درومم، زړه مې نه شي
.
چې ديدن د مين وکړمه تازه شم
لکه کښت چې په باران سره اوبه شي
.
د ښه یار بېلتون د ستوني پرې کول دي
په يرغ به ستونی چېرې پرې کاوه شي
.
په ارمان د هغه وخت یم، درېغه درېغه
که د زنې سيب یې بیا زما په خوله شي
.
د خپل يار د جداییه هسې کار دی
لکه سا چې له وجوده په واته شي
.
بخته هومره مدد بیا راسره وکړه
چې په غېږ کښې مې بیا تللی یار ویده شي
.
د خوشال سلام په واړه ښو یارانو
ګوندې بیا مې په لیدو سره زړه ښه شي
.
.
خاته = جګېدنه، پورته کېدنه
درځنې = درڅخه، در نه
کښت = فصل
یرغ = خوښه، مصلحت، پړین
درېغه، درېغه = ارمان ارمان، افسوس افسوس، هاې هاې
سیب = مڼه
واته = وتنه، دباندې وتنه، دباندې تلنه
ګوندې = ښایي، کېدای شي، شاید
(غوړچان: ممتاز خان)
15.07.2024 ; Monday