کابل کې د ارواښاد عبدالمجيد بابي فاتحه واخېستل شوه

نن (دوشنبه) د ۲۰۱۰ ع کال د مارچ د مايشتي لمړي نيټه په کابل کې د کندهار ولايت د اطلاعاتو او کلتور رياست د شهيد شوي رئيس عبدالمجيد بابي فاتحه دماسپښين له يوې نيمې بجې څخه تر درې نيمو بجو پورې واخېستل شوه.
دفاتحې مراسم دکابل په عيدګاه مسجد کې ترسره شول چې کوربه توب يې د اطلاعاتو او کلتور وزير دکتور سید مخدوم رهين، په تخنیکی چارو کې د ولسمشر صلاکار وزیر انجینیر محمد یوسف پښتون، د اطلاعاتو او کلتور وزارت معینان پوهنمل غلام نبی فراهی او وحید سلطان، د خواخوږی ادبي او کلتوري ټولني مشر الحاج غرزي خواخوږی، د ملی راډیو تلویزیون لوی رئیس دکتور عبدالواحد نظری، د کندهار د ټولنيزي ټولني مشر عبدالغفور خدام، ، ملي سوداګر حاجي محمديونس مومند او يو شمېر نورو فرهنګيانو او ټولنیزو شخصیتونو کاوه.
د فاتحې په مراسمو کې پر فرهنګيانو برسېره يو شمير دولتي لوړپوړیو چارواکيو هم ګډون کړى وو.
ارواښادعبدالمجيد بابى د فبروری پر ۲۴ مه په داسي حال کې چي د کور څخه د دندي پر خوا روان وو، د وسله والو کسانو لخوا ووژل سو.
نوموړى يو پياوړى ليکوال، څېرونکی او ژورناليست او له تېرو اتو کلونو راهيسې د کندهار ولايت د اطلاعاتو او کلتور رياست رئيس وو چي له نوموړي څخه يو شمير ارزښتناک علمي اثار هم پاته دي.