پښتانه څوک دي
پښتانۀ څوک دي؟ - د پښتنو په حقله ساٸنسي څيړنه
د ساٸنسي علومو نه انکار کول نمر په ګوته پټول دي ـ
کله چې د ساٸنسي علومو سره پښتانه نه وو بلد شوي او په ساٸنسي علومو باندې نه پوهيدل نو پښتانه به يې کله د ترکو پورې تړل کله به يې د اسراٸيلو پورې تړل او کله به يې خپل ځان ته منګول نيکونه لټول ـ بلکښې د قبطيانو ټپه به هم ورپورې وشوه ـ خو اوس هم داسې خلق شته چې بغير د څه دليل نه پښتانه د بني اسرائيلو پورې تړي او د خوشحال بابا دغه شعر د ثبوت دپاره راوړي چې:
په ښاٸست باندې ٸې ختمه دا وينا ده
چې په اصل د يعقوب قوم و ټبار
او بيا ورسره دا هم واٸي چې د خوشحال بابا دا شعر يا وينا زمونږ د پاره د صحيفې هومره اهميت لري ـ
خو زه نه پوهيږم چې داسې ښاغلي په حقيقت سترګې ولې پټوي او هغه ځکه چې اوس دوه او دوه څلور ثابته شوې ده چې پښتانه د بني اسرائيلو سره هيڅ تړون نه لري بلکښې پښتانه د دې خاورې زاړه بچي دي دا د چرته نه راغلي نه دي البته که اسرائيل دوي ته راغلي وي او د دوي سره لکه د عربو يعني د قريشانو ، سيدانو ميشته شوي وي او په دوي کښې ٸې ځان غيب کړے يا ضم کړے وي نو ممکنه کيدے شي خو د ساٸنسي څيړنې نه بلکل دا نه ثابتيږي چې پښتانه د بني اسرائيلو يا د سامي خلقو سره څه تړون لري ـ د ساٸنسي څيړنو نه زما مراد ډي اين اے ، لسانيات او د بشريات علوم دي ـ
دغه کوم بره پوهه سړے چې ما ذکر کړو چې پښتانه د خوشحال بابا په يو شعر باندې بني اسراييل ثابتوي نو دا د يو اپريدي چې په هند کښې اوسيږي او نورس اپريدي په نوم باندې ياديږي د هغه حواله ورکوي او واٸي چې هغه د هند د اپريدو د وينې څه سمپلونه راخستي دي او د اسرائيلو په لاٸباټرې کښې ٸې ټسټ کړي دي او د هغې نه ٸې دا نتيجه راباسلې ده چې پښتانه او اسرائيل د يو نسل نه دي او هغه لس قبيلې چې د اسرائيلو نه لاړې وې هغه هم دغه پښتانه دي ! خو دا خبره بلکل غلطه ده او هغه ځکه چې ما کله په انټرنيټ باندې د نوروس اپريدي په حقله لټون وکړل نو هغوي په 2006ء کښې د تاريخ ډپارټمنټ نه په هغه لس ورکو شوو قبيلو باندې پي ايچ ډي کوله کومې چې د پښتنو پورې تړے شي ـ خو چې کله دې نوروس اپريدي دغه د اپريدو ټسټونه لاٸباټرې ته وليږل د هغې نه هيڅ قسم نتيجه راونه وته او هغه مفروضه چې دوي د پښتنو په حقله د اول نه قاٸمه کړې وه هغه بلکل غلطه ثابت شوه ځکه چې د پښتنو او د بني اسرائيلو په ډي اين اے کښې د زمکې او د اسمان فرق وو په دې وجه باندې نورس اپريدي خپل هغه ريسرچ او ټسټونه تر اوسه پورې پټ ساتلي دي او منپر عام ته ٸې نه راوباسي ـ
نوروس اپريدي لکه د بره ذکر شوي سړي پښتانه په عاداتو او نومونو باندې بني اسرائيل ثابتول غوښتل خو ثابت ٸې نه کړے شول ـ
اوس راځو او دا ګورو چې تر ننه پورې د ډي اين اے په ترو باندې پښتانه دچا سره تړون لري ؟
د دې نه پس به په لسانياتي توګه باندې ګورو چې پښتانه د ژبې په نسبت چاته نيژدو دي په دې ضمن کښې به د پوهانو نظر ګورو ـ
ډي اين اے يو داسې څيز دے چې د دې په ذريعه د انسانانو نيکونه يعني د زرونو کالو شتون په ګوته کيږي ـ
لکه بره مو چې څنګه اووٸيل چې د ډي اين اے په ذريعه د پښتنو تړون د اسرائيلو سره په هيڅ جواز هم نه کيږي او هغه ځکه چې د اسرائيلو ګروپ بدل دے او د پښتنو بدل دے چې مخکښې به يې ذکر اوشي ـ
د برطانوې يو پروفيسر چې تهيو ډور پرفيټ نوميږي هغه د افسانو په بنياد باندې دا دعوه کوله چې پښتانه بني اسرائيل دي خو چې کله ٸې په 2009ء کښې د څه پښتنو ډي اين اے ټسټونه وکړل نو هغه دا ثابته نه کړلے شوه چې پښتانه بني اسرائيل دي او هغه ځکه چې د دوي او د بني اسرائيلو په وينه کښې فرق وو ـ
په 2010_ء کښې د هند يوې ماهرې شهناز علي د لکهنو د پښتنو د وينې سمپلونه واخستل او د اسرائيل په لاٸباټرې کښې ٸې ټسټ کړل د بني اسرائيلو سره خو هيڅ قسمه تړون د دې دواړو قومونو يا نسلونه خپلو کښې رانغلو ـ دغې زنانه ته د اسرائيلو وزارت د دې څيړنو ټول مصارف ورکړے وو او درې مياشتې دغه څيړنې ٸې وکړې خو هيڅ قسمه يو والے پکښې اونه موندلے شو او دغسې دا ريسرچ هم د بني اسرائيلي نظرٸې په ضد کښې اوښتل ـ
برق صيب د د يو اسرائيلي چې شلوانيټل نوميږي د هغه په حقله واٸي دا سړے واٸي چې د شفاهي رواياتو په بنياد پښتانه ځانونه بني اسرائيل ګڼي خو د ليباټرۍ معاٸناتو نه دا خبره بيخي نه ثابتيږي ـ
د امريکې يو ټيم د افغانستان او د پښتونخوا د پښتنو نه د سوونو په شمير کښې سمپلونه په 2014ء کښې واخستل او بيا ٸې اعلان وکړل چې د پښتنو او د بني اسرائيلو خپلو کښې هيڅ تړون نشته او دا ٸې هم ورسره اووٸيل چې پښتانه يعني افغانان او تاجک او هزاره دلته کښې د پنځو زرو کالو نه اوسيږي ـ او دا ٸې هم ورسره اووٸيل چې پښتو ژبه د سامي ېا د نورو خارجي ژبو سره څه تړون نه لري بلکښې دا ژبه د اريايي څانګې سره تړون لري ـ
ډاکټر الياس چې په جينيټک کښې ٸې خپله پي ايچ ډي د کوريا نه کړې ده او په 2020ء کښې ٸې په اردو ژبه يو کتاب راغلے دے چې (پشتونو کا جينياتي مطالعه ) په نوم باندې په مارکيټ کښې خپور شوے دے ـ
د هغه تحقيق په ساٸنسي بنيادونو باندې د قدر وړ ده ـ
هغه په هارډورډ پوهنتون کښې د پښتنو او اسرائيلو په ډي اين اے باندې کافي تحقيق کړے دے او د دې خبرې کوشش ٸې کړے چې دغه د بني اسرائيلي قيصه صفا کړي ـ
ډاکټر الياس په خپل کتاب کښې ليکي
" چې HGDP کښې د 22 پښتنو نمونې شاملې وې چې هغه نمونې د جديد سپر کمپيوټر په مدد سره وڅيړلے شوې او جينياتي معلومات ترې رابهر کړے شو چې د يو پښتون د نسلي شناخت دپاره کافي دي ـ دغې معلوماتو ته مونږ جينياتي مارکز وٸيلے شو کوم چې مونږ ريفرنس پينل په طور باندې د نورو جينيوم سره تقابل کوے شو ـ
د Ramabam Health care Campus Hefa Israel ېو نامور ساٸنسدان "Doron M. Behar" د دنيا 14 مختلف يهودي قبيلو بشمول د بني اسرائيل ډي اين اے راخسته او د دې مشاهده ٸې وکړه او يو ځان ته جينياتي پينل ٸې جوړ کړل چې د يهوديانو د نسلي شناخت دپاره استعماليږي ـ دغه يهودي مارکرز د هر پښتون نمونې سره وکتل شول په 22 نمونو کښې يو هم داسې ملاٶ نه شو چې په کومې کښې د بني اسرائيل يا د نورو قبيلو ډي اين اے سره څه مشابهت لري "
ډاکټر الياس مخکښې هم دې کتاب کښې ليکي :
" دغه تجزيه نوره هم د د پخيدو دپاره ما پخپله د دواړو پينلو خپلو کښې موازنه وکړه چې دواړه د يو بل نه مختلف وختل ـ
دغه تحقيق د نړۍ نورو ادارو هم تصديق کړل چې په کومې باندې مقالې خپرې شوې "
ډاکټر الياس د دې مقالو نومونه ورکړي دي چې زه دلته د يو څو مقالو نومونه ذکر کول غواړم ـ
Waldman, et al. 2016. The genetics of Bene Israel from india reveals both substantial jewish and indian incestry . plos one , 11(3)
Chaubey , et al . 2016 Genetics of the jewish populationof india . scientific report, 6
Lacau, H et al. 2012 Afghanistan from a y- chromosome perspective , European journal of human Genetics , 20 (10)
کله چې دغه ريسرچ خپور شو نو په دې باندې اعتراضات شروع شو چې آيا چې د دې کومو خلقو ټيسټونه شوي دي دا په اصل کښې پښتانه وو هم اوکنه اوکه پښتانه وو نو د کومې قبيلې سره ٸې تړون وو ؟ نو د دې نه پس د پښتنو په ډي اين اے باندې ساٸنسي کار نور هم وشوه ـ
د ټول نه اول د هزاره يونيورسيټۍ جينياتي ډيپارټمنت محقيقينو د پښتنو د مختلفو قبيلو په تړون يو رپورټ خپور کړو ـ دا رپورټ د هاٸير ايجوکيشن په مدد باندې سر ته ورسولے شو ـ په دې تحقيق کښې د پښتونخوا نسلي د خلقو نسلي څيړنه وشوه چې په هغې کښې ډي اين اے شامله وه او د غاښونو ساخت باندې هم څيړنه وشوه ـ دا تحقيق د 2010ء نه تر 2017ء پورې جاري وو او اوس دا رپورټ د ايچ اے سي په ويب ساٸټ باندې پروت دے چې هر وګړے ٸې ليدلے شي ـ د دې تحقيق مطابق د دې سيمې وګړي په نسلي لحاظ سره R1a هيپلو ګروپ سره تعلق لري ـ د دې ګروپ سره تعلق لرونکي 53 فيصده جوړيږي ـ يعني 53 فيصده پښتانه د R1a سره تعلق لري چې يو اريايي ګروپ دے او د سامي ګروپ سره هيڅ تړون نه لري ـ
دغه ګروپ د پښتنو په خاصه توګه د يوسفزو اعوانو سواتيانو په وينا يا ډي اين اے کښې زيات په کثرت سره ملاٶ شو ـ
د دې نه علاوه د پښتنو په نورو قبيلو کښې نور ګروپونه هم وموندل شول چې په هغو کښې R1b او R2 د ذکر وړ دي او دا ټول د ارين سره تعلق لري ـ
خو د اسرائيلو چې کوم ګروپ په ګوته کيږي هغه دا دي
J1,J2, E1B1B1
او داسې J1b , klalbla, kla9,dk2a2a N1b دا هغه مخصوص هيپلو ټاٸپس دي چې په يهودو کښې موندے شي ـ
د لاهور په يونيورسټې کښې د خټک قبيلې په حقله د۔ ډي اين اے چې کومه څيړنه شوې وه په هغې کښې د يهودو څه اثرات راوتي وو خو ډاکټر الياس چې کوم تحقيق د ډي اين اے په ترو وکړلو د هغه د نتيجې مطابق د خټک قبيلې د يهودو يا اسرائيلو سره هيڅ نزديکت په نظر رانغلو او هغه ځکه چې د خټک قبيلې او د يهودو په ډي اين اے کښې ډېر زيات توپير وو ـ
ډاکټر الياس په خپل کتاب کښې دغه چارټ ورکړے هم دے چې هر وګړے ٸې ليدے شي ـ
هارډورډ پوهنتون د سنټرل ايشيا د خلقو د هډوکو څه نمونې ټيسټ کړې چې په هغې کښې 128 نمونې د سوات نه او نورې نمونې د افغانستان نه راټولې کړلې شوې وې ـ د دې هډوکو د ټيسټ نه دا معلومه شوه چې دا پنځه زره کاله زاړه دي او د دې هډوکو رشته د اريايي قبيلو سره ده او د R1a او او د هغه بره ذکر شوي ګروپ سره تعلق لري ـ نو د دې ټيسټ سره دا هم معلومه شوه چې په دې سيمه کښې د ارياٶ څه قبيلې د پينځو زرو کالو نه اوسيږي يعني د پينځو زرو کالو راسې ژوند کوي ـ بل د دې تحقيق نه دا هم ثابته شوه چې د دې خطې 80℅ خلق د دې ذکر شوي ګروپ سره تعلق لري چې د دې په وجه آرين ثابتيږي ـ
ښاغلي عبدالروف خان ماته د نوې څيړنې په حقله څه معلومات راليږلي دي د هغوي پ وينا چې په دې څيړنه کښې زه خپله هم وم او دا څيړنه پروفيسر ډاکټر ايوب کاکړ د امريکن ساٸنټسټ په مرسته سر ته رسولې وه او د هغې څيړنې نه دا نتيجه راوتې وه چې پښتانه د ارين سره تړون لري هغه څيړنه زه دلته کښې د لوستونکو سره شريکوم ـ دا څيړنه په انګريزي ژبه کښې ده خو ما اردو ته ژباړلې ده د لوستونکو د اسانتيا دپاره :
"سب سے عام نسب (haplogroups R1a1a*-M198 اور L3-M357) کا تخمینہ 15 Y- مخصوص STR لوکی کے سیٹ کا استعمال کرتے ہوئے لگایا گیا تھا۔ مشاہدہ شدہ ہیپلو گروپ کی تقسیم شمالی آبادی کی کچھ حد تک جینیاتی تنہائی کی تجویز کرتی ہے، ممکنہ طور پر ہندوکش پہاڑی سلسلے نے اسے جنوبی افغانوں سے الگ کیا ہے جن کا پاکستان سے پڑوسی پٹھانوں کے ساتھ زیادہ رابطہ رہا ہے اور برصغیر پاک و ہند سے ہجرت ہوئی ہے۔ ہمارا مطالعہ افغانستان اور پاکستان سے تعلق رکھنے والے پٹھانوں کے درمیان جینیاتی مماثلت کو ظاہر کرتا ہے، یہ دونوں ہیپلوگروپ R1a1a*-M198 (>50%) کی برتری اور ایک ہی ماڈل ہاپلوٹائپ کے اشتراک سے نمایاں ہیں۔ مزید برآں، R1a1a-M198 کی اعلی تعدد اور پٹھانوں میں G2c-M377 کروموسوم کی موجودگی خزاروں کے فائیلوجنیٹک سگنلز کی نمائندگی کر سکتی ہے، جو پٹھانوں اور اشکنازی گروپوں کے درمیان ایک مشترکہ ربط ہے، جبکہ E1b1b1a2-V13 کی عدم موجودگی ان کے یونانی نسب کی حمایت نہیں کرتی۔
د دې څيړنې نه دا نتيجه د عبدالرٶف خان صيب په وينا راوځي چې د پښتنو تعلق د ارين سره خو دے دے بلکښې ورسره چې کوم پښتانه په کشمير ګلګت او بواهوي بيلټ کښې ميشت پښتانه مستونګ کهډ کوچه او قلات کښې د هغوي وينه اخستې شوې هغه هم ارين ثابت شوي دي ـ
جميل شموزے چې زه د هغوي تحقيق يو جديد تحقيق ګڼړم ـ هغوي چې د انټرنيټ نه څه معلومات د پښتنو په حقله راټول کړي دي او برق صيب په خپل کتاب پښتون قام يا نسل کښې خپور کړي دي د هغو نه هم څه معلومات د خپلو لوستونکو سره شريکوم ـ
ساٸنسدانانو د انسانانو درجه بندي کړې ده او د شريکو نيکونو اولاد ٸې په يوه ډله کليډ کښې شامله کړي دي ـ
د پښتنو ډي اين اے چې کله اوکتے شوه نو د Haplogroup-R-M420) فريکونسي پکښې (51.02) فيصده وه او د (Haplogroup -R-QM242) فريکونسي پکښې (16.13) او (18) فيصده ده هيپلو ګروپ R1A په يوريشن ګروپ کښې زيات دي او دا ګروپ د سکنډې نيو يا وسطي يورپ جنوبي ساٸبريا نه تر جنوبي ايشيا پورې خور دے ـ
د R1A ګروپ د زړښت په حقله ليکي "R1A د 22000 کلونو نه تر 25000پورې زوړ دے . M-417 تر 5800 کالو پورې زوړ دے ـ
د افغانستان په خلقو کښې Subclade R.1.A.1A يا M-417 فريکونسي په پښتنو کښې 52 فيصده کرغيز کښې 50 فيصد او تاجکو کښې 30_فيصده دے ـ
د ډي اين اے د تجربو نه ثابته شوه چې په پښتنو کښې کليډ R1A او سب کليډ R.1.A.1A زيات دے ـ
اوس د دې معلوماتو دپاره چې د پښتنـ د پيداٸشي کليډ علاقه کومه ده په دې سلسله کښې د پوهانو بيلې بيلې راٸې دي ـ
خو هندي پوهانو د دې ګروپ زمکه افغانستان ايران زمکې په ګوته کوي ـ
پيټر اے انډر هل وغيره د يوريشيا په 126 ځايونو کښې د 16244 خلقو د وينو معاٸنه کړې ده او نتيجه ٸې ترې دا راباسلې ده چې د دې ګروپ د بدلون او خوريدو زمکه ايران او افغانستان ده ـ
د ساٸنسدانانو د مشاهداتو نه ثابته شوې ده چې د پښتنو هيپلو ګروپ R1RA1A تعلق د پيداٸش زمکې هم هغه دي په کومو زمکو کښې چې ساٸيتهين او يورپ قومونه اباد وو ـ
د دې نه علاوه نور هم د پښتنو په حقله د ډي اين اے ټسټونه شوي دي چې د هغې نه دوه او دوه څلور ثابته شوې ده چې پښتانه د ارين سره نزديکت لري نه چې د نورو خلقو يعني بني اسرائيل يا سامي خلقو سره ـ
خو لوستونکي به دا سوچ کوي چې د پښتنو تاجکو يا د نورو ګانډي خلقو دا ډي اين اے ولې دومره نزديکت لري يا په پښتنو کښې د تاجکو وغيره ډي اين اے ولې موندلے شي نو د هغو دپاره چې پښتانه د ايشيا د ملا په تير باندې پراته دي دلته بلها قومونه راغلي دي او د پښتنو سره اباد شوي دي څ ٸې پښتنو ته ورکړي او څه پښتنو ورکړي دي بلکښې بعضې لوي لوي قومونه خو پکښې بيخي غيب شوي دي او اوس ٸې هيڅ پته نه لږي چې دا نور خلق دي بلکښې اوس سوچه پښتانه ګڼلے شي او ګڼل ٸې هم پکار دي او هغه ځکه چې هر هغه وګړے چې پښتږ واٸي پښتو کوي او پښتو پالي هغه پښتون دے ـ بل د پښتنو نه به مـونږ ديو خالص نسل طمعه هم نه کوو او هغه ځکه چې په دنيا کښې په هر نسل کښې ګډونشوے دے بلکښې د نسل نه قوم جوړ شوے دے ـ خو د پښتون قوم د زړښت نه هيڅوک هم انکار نه شي کولے ـ بلې برخه کښې زه کوشش کوم چې د پښتنو په لسانياتي اړخ باندې سر سري نظر د پوهانو د رايو په رڼا کښې واچوم او دا ثابته کړم چې په لسانياتي توګه هم پښتو د سامي ژبو سره څه تړون نه لري ـ
د ډي اين اے نه خو دا ثابته شوه چې پښتانه د اريايي قبيلو نه يوه قبيله ده او دا هغه خلق دي چې په دې خاوره کښې د زرونو کالو نه اوسيږي يعني دوي د بهر نه نه دي راغلي بلکښې د دې خاورې زاړه بچي دي ـ
اوس راځو او ګورو چې د ژبې په بنياد پښتانه څوک دي يعني د پښتنو ژبه پښتو د پوهانو په نظر کښې د سامي ډلې سره نزديکت لري اوکنه د اريايي ډلې سره نزديکت لري ـ
کله چې مستشرقين يعني يورپين برصغير ته نه وو راغلي نو د خلقو دا خيال وو چې پښتانه او پښتو د سامي ژبې او خلقو سره نزديکت لري خو چې د مشرق په ژبو کار شروع شو په خاصه توګه د رګويد او اويستا په ژبو کار شروع شو او د دې سره سره په پښتو کلپروتهـ کار شروع کړو نو دې سړي دا اعلان وکړو چې پښتو ژبه يوه سوچه اريايي ژبه ده ـ د دې نه پس ډار مسټيټر په پښتو باندې ښه کار وکړو او د اويستا او پښتو ژبه ٸې خپلو کښې تقابل کړه او دا اعلان ٸې په جار وکړو چې پښتو ژبه نه په هندي لهجو کښې شامله ده اونه د پارسۍ او پهلوۍ نه پيدا شوې ده بلکښې دا ژبه د زند اوستاٸي يا د ژند په شان د يو بلې ژبې نه راوتلې ده ـ چونکې اويستاٸي ژبه هم يوه اريايي ژبه ګڼلے شي نو د دې پوهه په خيال پښتو هم يوه اريايي ژبه ده ـ
مسټر جى اے ګريوسن په خپل کتاب (lanuestic of india) کښې د پښتو ژبې په حقله ډېر په تفصيل سره خپله نظريه وړاندې کړې ده او دې نتيجې ته رسيدلے دے چې پښتو يوه اريايي ژبه ده ـ
ډاکټر ترومپ د پښتو ژبې په حقله چې کوم تحقيق کړے دے د هغوي په خيال باندې چې دا ژبه د غربي ايراني په ډله کښې نه ده بلکښې دا ژبه د هند اريايي ژبو په ډله کښې شامله ده خو سوچه هندي ژبه هم ورته نه شو وٸيلے ـ
د ترومپ په خيال باندې پښتو ځان ته يوه مستقله ژبه ده چې د هندي او ايراني ژبو د مينځ کړۍ ده ـ خو ترومپ دا حقيقت مني چې پښتو يوه اريايي ژبه ده ـ
ډاکټر هنري هم پښتو يوه مستقله ژبه ګڼي او د سنسکرت او ژند سره ٸې تعلق ښاٸي ـ او تعلق وجه ٸې الفاظ د ګرامر اصول د اعدادو ساخت او وينا ښاٸي ـ
نو دا پوهه هم د پښتو د اريايي توب دعوه کوي ـ
ميجر راورټي چې په اصل کښې د اسرائيلي نظرٸې طرفدارے دے خو پښتو ژبه د اريايي ژبو نه يوه ژبه ګڼي او د زند او پهلوي تر مينځه ٸې مشابهت په ګوته کوي ـ
د پښتو ژبې په حقله د کليپروتهـ نه پس چې چا ډېر کار کړے دے هغه الفسټن دے دې سړي د پښتو ژند او پهلوي خپلو کښې مقايسه کړې ده او دې نتيجې ته رسيدلے دے چې د دې ژبو خپلو کښې ډېر زيات نزديکت دے او د مور پلار ورور او خور الفاظ ٸې د مثال په توګه راوړي دي ـ دې ښاغلي د پښتو ژبې 218 کلماتو پلټنه کړې ده او بيا ٸې دا اعلان کړے دے چې د دې کلمو تعلق د سامي ژبو سره نه پاتې کيږي بلکښې د اريايي ژبو سره نزديکت لري ـ د دې مستشرقينو نه علاوه چې پښتو ژبه ٸې د خپلو پلټنو نه پس اريايي ښودلې ده هغه انولډسن ، اولف کيرو وغيره دي ـ
په دې حقله ما يو مضمون ليکلے وو چې پښتانه ارين ولې ګڼلے شي هغه هم لوستونکي د تفصيل دپاره ليدے شي ـ
ډاکټر مجاور احمد زيار چې د بهر ملک نه ٸې په لسانياتو کښې خپل پي ايچ ډي کړې ده او يو شمير کتابونه ٸې ليکلي دي هغه هم د خپلو څيړنو نه پس پښتو يوه اريايي ژبه ثابته کړې ده او په خپل کتاب پښتو او پښتانه د ژبپوهنې په رڼا کښې ٸې په دې موضوع ښه پراښه بحث کړے دے د تفصيل سره د دوي دغه کتاب لوستونکي ليدلے شي ـ زيار صيب د پښتنو په مونډ باندې د ژبپوهنې په رڼا کښې غږيدلے دے ـ زيار صيب يو ځاے کښې واٸي چې د جهلم سره يوه کتبه د ساکي قام موندلې شوې ده چې په هغې کښې د ساکي قام د بادشاه دپاره د څښتن تورے استعمال شوے دے او دا تورے سوچه د پښتو ژبې ده چې نن هم په پښتنو کښې مستمل دے ـ يعني نن ٸې هم پښتانه د خپل مشر دپاره کاروي ـ
زيار صيب په دې کتاب کښې پښتو ژبه خو اريايي ژبه بې شکه چې ګڼي خو د ډاکټر ترومپ او الفسټن او مارګنسټرن هغې خبرې ته تقويت ورکوي چې پښتو ژبه نه د هندې يعني سنسکرت سره تعلق لري او نه د پارسو يا پهلوي سره بلکښې دا ژبه ځان ته يوه مستقله ژبه ده ـ خو زيار صيب پښتو ژبه د ساکي يا پاميري ژبو سره نيژدې کوي او بقاعده د دې ژبو توري راوړي ـ
زيار صيب څه توري د اوستا او پښتو راخلي چې زه ٸې دلته وړاندې کوم ـ
پښتو (ژوند) اوستا ( jvant) پښتو (ژرنده) اوستا (jarnada) پښتو( وينه) اوستا (vohuni)
داسې ډېر لفظونه دي چې زيار صيب راوړي دي او د اوستا او پښتو ٸې خپلو کښې قربت په ګوته کړے دے۔ ۔ که کوم لوستونکے په دې حقله نور معلومات غواړي نو دا کتاب دے ضرور ولولي ـ
ويلهلم ګايګر يو بل مستشرق يا بهرنے دے چې پښتو ژبه ٸې دوه او دوه څلور ثابته کړې ده چې دا يوه اريايي ژبه ده ـ د په خپل کتاب ( Etymology and lautelehre des Afghanistan) کښې پښتو په ايتمولوجي فونولوجي په چوکاټ کښې له اوستا سره څيړلې ده ـ
په ايتمولوجي برخه کښې ٸې 389 کلمې راخستې دي او د اويستا او نورو اريايي ژبو سره ٸې تقابلي جاٸزه اخستې ده چې د دې ژبو سره نزديکت لري ـ
ګايګر په خپل اثر کښې څه توري د پښتو او اويستا راوړي دي چې زه ٸې دلته د لوستونکو سره د بيلګې په توګه شريکوم :
پښتو ( مړ) اويستا (mereta) پښتو (غر) اوستا (gairi)
نيکه اويستا (Nyaka) واوره برف اويستا (vafra)
د پښتو په اريايي ثابتيدو کښې ختځ پوهه مارګنسټرن نوم هم د ذکر وړ دے دې سړي هم په پښتو ژبه کښې د قدر وړ کار کړے دے او دې سړي د دې خبرې د ثابتيدو کوشش کړے چې د پښتو ژبې تعلق د پاميري ساکي خوتني ژبو سره دے يعني يښتو خو اريايي ده خو د پاميري ژبو سره نزديکت لري ـ په اند باندې زيار صيب هم دے ـ
زمونږ سره نور شواهد او دلايل هم شته چې پښتو ژبه يوه ارياٸي ژبه ثابته کړو ـ او اوس وخت کښې خو په پښتو لينګويسټک کښې باقاعده د بهر ملکونو يعني جرمني نه تر پي ايچ ډي کچه کار کيږي ـ په زلمو ماهرين لسانياتو کښې زمونږ سره د يوسف جذاب په شان تکړه محققين شته چې د جرمني نه ٸې خپله پي ايچ ډي کړې ده او اوس وخت کښې ٸې د تهيسز کتاب هم چاپ دے هغه هم په دې ضمن کښې لوستونکي ليدلے او کتلے شي ـ
د دې نه علاوه د سډني پروفيسر احسان ازرين د پښتو او اروپاٸي ژبو خپلو کښې ريښې موندلي دي او مرکه ٸې لوستونکي اوريدلے شي هغوي په دې حقله ډېر ښه کار کړے دے چې د پښتو اريايي اړخ نور هم روښانه کوي ـ
دا ټولې خبرې يعني ډي اين اے او ژبپوهنه چې مونږ په نظر کښې اوساتو نو مونږ ته دا علوم دا اجازت نه راکوي چې پښتو ژبه او پښتون قوم د اريايي ژبو او قبيلو نه علاوه د نورو خلقو يعني سامي يا عبراني سره څه تعلق لري ـ که څوک ٸې د خوشحال بابا په يو شعر بني اسرائيل ثابتوي نو هغه هسې نوي کول کښې يوه غلطه نظريه بلکښې افسانه خواروي ـ پښتانه نه يواځې د ډي اين اے او لسانياتو په بنيادي ارين ثابتيږي بلکښې که مونږ د ارياٶ مذهبي کتابونه يعني اويستا او رګويد چې درې او څلور زره کاله زړښت لري اوګورو هغې کښې هم پښتانه لکه د نمر ځليږي او دا خبره صرف حبيبي صيب نه کوي بلکښې ټول هغه مستشرقين چې د پښتنو په تاريخ او ژبه ٸې کار کړے هغوي ټولو منلې ده چې پښتانه د دې خاورې بلکښې د رګويد او د اويستا خلق دي ـ که په پښتنو کښې د اسرائيلو څه عادات وي نو دا څه د فکر وړ خبره نه ده ځکه چې پښتانه په يو داسې ځاے کښې پراته دي چې دې ته د ايشيا د ملا تير واٸي ډېر قومونه راغلي دي لکه يونانيان ترکيان ساسانيان عرب منګول او داسې نور څه به ورنه پښتنو اخستي وي او څه به پښتنو ورکړي وي ـ خو هغه بمرني قومونه چې د پښتنو سره پاتې شوي دي هغوي په پښتنو کښې ځان داسې ضم کړے دے چې اوس ٸې هډو دا پته نه لګي چې دا څوک بل څه دي ـ زمونږ سره ٸې مثال سيدان او قريش شته دي چې اوس سوچه پښتانه دي ـ
دا ليکنه چې ما شروع کوله نو په دې نيت مې شروع کړه چې زه خپل نوي کول ته هغه څه وړاندې کيږدم چې کوم حقيقت وي ـ هيله ده چې زما دې ليکنې ته به نوے کول د قدر په سترګه ګوري ـ
نور اپريدے