نوی کال/ د سترګو نم /مها جر
مها جر
خوږ وطن سپرلی سپرلی درنه شی پاته
لکه مور او یا زړګي درنه شي پاته
ستا به څنګه نه یادیږي راته وا یه
چې حجرې سیتار منګی درنه شي پاته
په ولله ماشوم زړګي دې په سلګو شي
که د خپل اویا پردی درنه شي پاته
کلیوال او خپل همزولي تل یادیږي
د خپل پلار پوله پټی درنه ښي پاته
د بام خوب داوړي شپه د ستورو لاندې
یخ شمال نری نری در نه شي پاته
د حفیظ ملیار غزلې پسی ژاړي
د ګدر دنګ چنارګی درنه شي پاته
د سترګو نم
ته چې زما ځینې صنم غواړې
زړګیه بیا د سترګو نم غواړې
پریږده د زړه مینه نن نکوی څوک
څله د ځان لپاره غم غواړې
زه به زخمي زړګی کړم څنګه ټکور
زه طبیب نه یم ته مرحم غواړې
یم مهاجر یو بې وطنه انسان
ته په ماتم کې بل ماتم غواړې
حفیظ ملیار يي چې په اوښکو لیکي
د غم غزلې دم په دم غواړې
نوی کال
نوی کال نوی ژوندون
نوی خیال نوی مضمون
چې شو واړه مینه مینه
هر لیلا ته خپل مجنون
جوړ باران د محبت شې
شي ظالم دښمن زبون
نورې او ښکې تویی نشي
داسې نه لکه پرون
په دنیا د بشریت کې
وي د سولې کلک تړون
بی وطنه مهاجر مو
خپل وطن ته شي راستون
ای حفیظ ملیاره کاشکې
جنګ نه خلاص شي هر پښتون
31.12.2013Dienstag
یوافغان یوافغان تل افغان تل افغان
زه پښتون که پشيي یم
که ایماق نورستاني یم
هزاره او که تاجک یم
که ازبک نورستانی یم
دا وطن شریک وطن دی
زمونږ روح دی زمونږ ځان
یو افغان یو افغان تل افغان تل افغان
لغمانی که کابلی یم
مزاری که بدخشی یم
دقندهار که دفراه یم
د تخار که پنجشیری یم
زمونږ وینه ده شریکه
یو دخاوری وارثان
یوافغان یوافغان تل افغان تل افغان
د میرویس نیکه بچیان یو
په حمت دخوشالخان یو
لرو جاله دبازانو
طور یالي یو ننګیالیان یو
خپل بیرغ مو لوړ ساتلی
اتلان یو دمیدان
یوافغان یوافغان تل افغان تل افغان
مونږ دسولی مینان یو
مونږدشمعې پتنګان یو
مونږ د جنګ ختمول غواړو
صادقان یو عاقلان یو
دحفیظ ملیار ګلشن دی
داښایسته افغانستان
یوافغان یوافغان تل افغان تل افغان
03.01.2014