جنګيرکې
ژبورې جنګيرکې، جنګيرکې!
زړه مې څله خورې شيشکې، جنګيرکې؟
بس کړه بس کړه، له ناندرو نه دې لوګى شم
رقيبان وهي چکچکې، جنګيرکې!
ژاړه مه، راشه خوړلې خو مې نه يې
در واپس به کړم مچکې، جنګيرکې!
زما سترګې آباسين د سرو ګونګريو
ته تصوير شه د بطکې، جنګيرکې!
د سرو شونډو د کنځا بلا دې واخلم
ګل شي وسپړي غونچکې، جنګيرکې!
زړه هلمند، آرمان طالب او دا ستا سترګې
بې پيلوټه الوتکې، جنګيرکې!
ته وا ستا نو د حمزه بابا غزل دى
چې پر ما کوې نيوکې جنګيرکې!
(جلال امرخیل)