نورمحمد ترکي ته
سږکال د چنګاښ د میاشتې په ۲۳ نېټه د پښتو د ادب د ځلانده ستوري، د پښتو د ادب د ریالیزم د سبک د بنسټ ایښودونکي او د شلمې پېړۍ د دوهمې نیمايي د وتلي سیاسي شخصیت نورمحمد تره کي د زېږېدوسلمه کالیزه ده. په ۱۳۵۸ کال کي د دې ورځې په مناسبت د پښتو ژبې ستر شاعر مرحوم اجمل خټک دا لاندي شعر ډالۍ کړی
اجمل خټک لیکي:
« دا چه د خلقو او ټولو محنت کشو د ګران مشر د زېږېدنې د ورځې په مناسبت د هغه په نامه
ټولو خلقو او اولسونو ته د مبارکي خط لیکلو اراده وکړه، نو د نثري خط په ځای دا اشعار ولیکلي شول او په دې بختوره ورځ خپل ګران ملګري ته دا « سور ستوری » په مینه پېش کوم سور ستوری
نن سحر چه نمر ختلوزمونږ غرو کښې ور سره وو یو سور ستوری پلوشو کښې
د شعور رڼا يې وکړه په هیواد کښې نوی ژوند يې را پیدا کړو اولسوکښې
د خوارانو د کوډلو حرکت شو زلزلې يې را پیدا کړې محلو کښې
په درو او اورشوګانو کي را خورشو د غیرت وینه يې ګرمه کړه رګو کښې
د ځوانانو د شعور ډېوې شوې بلې د ژوندون احساس پیدا شو په زړو کښې
په دې زوړ هیواد کښې نوې رڼا راغله د نهضت سحر ښکاره شو تورو شپو کښې
د ذهنونو تور تمونه شول روښانه سپینه ورځ شوه د وهمونو جزیرو کښې
د افکارو سپرلي وشیندل ګلونه نوې هیلې رامسکې شوې په غنچو کښې
د محنت د سباؤن ستوری را جګ شو غلبلې شوې د ستم تورو تیارو کښې
د ماضي تور زنځیرونه يې وراسته کړل د یوه نوي مستقبل په ولولو کښې
د ایشیا د زړو زخمونه سرې لمبې شوې د مشرق د سور سحر په منارو کښې
سور بیرغ شو د شنکي آسمان لمن کښې سپین سحر شو دهیواد په غاړو غرو کښې
اولسونه رابیدار شول راولاړ شول د دې ستوري په روښانه پلوشوکښې
خواری کښ د نوي دور سور لښکر شو تندر پرېوت د رجعت په کوټکو کښې
د هیواد نه چغه پورته د اولس شوه زلزله شوه د زردارو په بنګلو کښې
په رڼا ورځ تر نه سور انقلاب جوړ شو راولاړ شو د ځوانانو ارادو کښې
د پېړیو د ستم خوني شوې ړنګې د خلقیانو د شعور مستو څپو کښې
په هیواد کښې جنډه جګه دمحنت شوه ستم ښخ شو د ماضي تورو ايرو کښې
اولسونو کښې خوږه ورورولي راغله مینه مینه ده په سترګو په سینو کښې
استثمار د ظالمانو سره ورک شو اوس به يې مینه راټوکیږي په پټو کښې
لاړو وخت د مفت خورو خانانو تېر شو مستقبل دی د بزګرو په خولو کښې
د دې ستوري د رڼا له برکته اخترونه دي په غرونو په رغو کښې
د امو د زر زري څپو عکسونه نن ځلیږي د اټک رڼو اوبو کښې
د هیواد د غرونو سور ستوري ته کیږي اتڼونه په بلوچو پښتنو کښې
فرق د ژبې د نژاد د منځه لاړو ولولې دي خواریکښو شازلمو کښې
د سالنګ د سپینو واورو ځل ته خاندي بحر هند کي ملغلرې په سیپو کښې
د انسان د ارتقاء مثال به بل وي سره بڅري شته زمونږ په انغرو کښې
چي يې سترګي کړې د ټول هیواد روښانه دغه ستوری شو پیدا په تره کو کښې
ستا اجمل خټک
۱۴ جولای ۱۹۷۹