روغه سټه
هغه څه دی روغ صحت دى
چې بهتر تر سلطنت دی
ـ
د دنیا دولت که ښه دی
تر دولت نه ښه عزت دی
ـ
چې ډېر ښه دی تر توقیره
یو عفت بل صداقت دی
ـ
چې سړی له غمه خلاص کا
هغه څه دی قناعت دی
ـ
په طاعت که تهٔ لویي کړې
حبطه هغه طاعت دی
ـ
چی فایده لري بې شماره
هغه څه دی، مصلحت دى
ـ
په منت چې ورکؤل کا
هغه کله سخاوت دی؟
ـ
چې دوزخ دى په دنيا کې
د ناپوه سره صحبت دى
ـ
خپل نيت ښه لره خوشاله
که څه ښه دی، خو ښه نیت دی
ـ
ـ
توقیر = درناوی، درنښت، عزت
عفت = سپېڅلتوب، پاک توب، پاک لمني، پاکي
صداقت = رښتینولی، رښتیا، اخلاص
قناعت = بسیاینه، بسیاتوب، بسنه، کفایت، په لږ څيز صبرېدنه
طاعت = ۱) عبادت کونه ۲) غاړه اېښودنه، قبلونه، فرمان وړنه
حبطه = چټي، خوشی، فضول، بې فایدې
مصلحت = ښه وړانديز، مشوره، ښه صلاح
منت = ۱) احسان، نېکي، سلوک ۲) شکريه ۳) عاجزي، زاري، خوشامد
سخاوت = کرم لرنه، بخشش لرنه، زړه لرنه، ځوانمردي، خيراتونه، خيرات، ورکړه
صحبت = مرکه، خبرې اترې، مجلس
ارمغان خوشال خټک رح
مخ - ۶۶۵