پام کوه ماشې ته
ښکاري ته
اى ښکاري اشنا! درته سلام کوم
پرېږده چې دا سپينې مرغۍ والوزي
لاړې شي جوړې جوړې گلونه شي
ښکلي شي ښايسته شي امېلونه شي
واخلي په وزرونو کې تنکي بچي
وموښي سينو کې گلالي بچي
سپينې سرې مښوکې زرکني بچي
پام کوه!
پام کوه ماشې ته گوتې مه ور وړه!
اى ښکاري اشنا درته سلام کوم
پرېږده چې دا شنو جلگو کې وځغلي
پېغلې د هوسيو د دامان په لور
واړوي پيکي د شنه اسمان په لور
وخاندي راتاوې شي مستي وکړي
ورغړي نخرې وکړي خوښي وکړي
پام کوه!
پام کوه ماشې ته گوتې مه ور وړه!
اى ښکاري اشنا درته سلام کوم
پرېږده د غونچو په لمن پريوځي
زموږ دکلي باغ کې د سپرلي بلبل
زموږ د خمارونو شرابي بلبل
پرېږده چې په سرو مښوکو وبولي
زموږ د بام د پاسه د سپرلو سرود
بڼ ته د غوټيو د ښکالو سرود
ځمکې ته د ورېځو بارانو سرود
پام کوه!
پام کوه ماشې ته گوتې مه ور وړه!
اى ښکاري اشنا! درته سلام کوم
گوره دا بې ژبې مرغان مه وله
نه يې چې کوم ووړ بچى بې موره شي
ته هم گوره پلار يې او بچى لرې
پېغله لور ښايسته زوى گلالى لرې
درد لرې، ارزو لرې، زړگى لرې
نو!
اى ښکاري اشنا! درته سلام کوم
پام کوه ماشې ته گوتې مه ور وړه
(اسحق ننګیال)