باچاخاني
پښتنو داسې خوار وزار ولې یې؟
په سمه لاره شئ بې لار ولې یې؟
سوچ خومو شته ستاسو دسوچ ترجماني پکار ده
باچاخاني پکار ده
خپله پښتو لکه د مور وساتئ
خپله حیا لکه د خور وساتئ
د ښو اخلاقو نمونې شئ وروڼو
ځان له په هر کلي کې ورور وساتئ
د نفرتونو نه څه نه جوړیږي
ددې جنگونو نه څه نه جوړیږي
انسانيت او سړيتوب ایزده کړئ
ددې ظلمونو نه څه نه جوړیږي
تاسو د یو بله ویزار ولې یې؟
پاتې د مينې د اظهار ولې یې؟
پښتنه مينه پاکه مينه افغاني پکار ده
باچاخاني پکار ده-
(کرن خان)