غزل
تا په رڼـــــــا پسې, تورتم ته ريباري وکړله
حالاتو مونږ سره دې څرنګه يـــــاري وکړله
څه د رڼا ستوري لرل مونږ د ګوتو په شمار
د هغه ستورو په لوېدلو دې خواري وکړله
د تورې شرنګ مې راپرېوځي تر بنګړو رسېږي
تا د شـــــملو، تــــا مې د تورو دلالي وکړله
زمونږ تندي دي راپولۍ کړه, د جنت په تمه
اخر دې سور دوزخ ته مونږ باندې زارۍ وکړله
ما درنه يو غوښته تا بـــــل نقش راونيو حاله
زما د طبيعت خلاف دې خپله کولالي وکړله
لا دې په يوه لاس کې تسپې بل کې پيالې ورکړلې
په خپل تخليق دې څه بېخونده ګلکاري وکړله
زاهد هم ونيوه نغمه د سُر له تــــــاله سره
په هر دريځ دې جـــــــادوګره فنکاري وکړله
د کــــوټوال عقل به پخپله له خپل کوره وځي
د کوپړۍ کور باندې يې ستا فکر مستي وکړله
(استاد عرفان الله کوټوال)