پښتنه دوعا
يوه پښتنه دعا
سید صابرشاه صابر
اے خدایا د دے خاورې د پښتو خلق دے تل وي
اے خدایا د شملو او د پټکو خلق دے تل وي
اے خدایا د دے خاورې د قسمت ستورے رڼا کړې
اے خدایا چرته نوے ګجو خان راکښې پیدا کړې
اے خدایا د بیربل لښکرې خپلو کښې سا سا کړې
اے خدایا د شېرشاه سوري خوبونه مې ریښتیا کړې
چې ټول پښتون جرګه کړي د جرګو خلق دے تل وي
اے خدایا د شملو او د پټکو خلق دے تل وي
اے خدایا "ننګرهار" مې یو ځل بیا چمن چمن کړې
اے خدایا خپل "سپین سرے" پېښور راته لندن کړې
د نافو په خوشبؤ او په وږمو یې سر وڅېر کړې
اے خدایا د خېبر دشتې ډاګونه مې ّختن کړې
د خاورې د ښائیست , د ترانو خلق دے تل وي
اے خدایا د شملو او د پټکو خلق دے تل وي
د نوؤ کلتورونو , د یرغل نه امان راکړې
د خپل جماعت, د خپلې حجرې , غل نه امان راکړې
دا قام ډیر څانګې څانګې دے دا قام راله "راټول" کړې
د دے وخت، د مغروره مغرور مّغل نه امان راکړې
دے قام کښې د "رڼا" د "ارادو" خلق دے تل وي
اے خدایا د شملو او د پټکو خلق دے تل وي
اے خدایا نوې نوې خوشالۍ مو نصیبه کړې
د نوې دنیا ، امن او سیالۍ مو نصیبه کړې
اے خدایا د سردار د دوجهان په نوم یې غواړم
را نوې بیا زړې کړې "ورورولۍ" مو نصیبه کړې
چې وخت سره داؤ داؤ شو د جزبو خلق دے تل وي
اے خدایا د شملو او د پټکو خلق دے تل وي
۲۸ اکتوبر ۲۰۲۵