پتره ګره
سید عبید الله نادر
پتره ګره!
مات زړه پتره کوی شــي، پتره ګره؟
دردونه پریـکوی شــې، پـــتره ګـره؟
ناهیلي مو دي زړونه او مات شــوي
نو ته یې،جــوړوی شــي، پتره ګره؟
اخته په رنځ د ځـــان ځــانۍ یو واړه
نو ته مو یو کــــوی شي ، پتره ګره؟
لــیری له غـــوغا د دي دنــــیا نه یې
زمونږ حــالات لیـدی شې پتره ګره؟
زړونه مو زنګــونه د کیـــــنې کړي
ته یې صفــا کــوی شې، پتره ګره؟
خیري د باطن مو په ظاهر ښکاري
خیري مـو مینځی شـــې، پتره ګره؟
هر خــواته کیـــنې او نـفرتــونه دي
ته مینه خـــوروی شې ، پتره ګره؟
ډوبــیږو د وحــشت په ګـــــردابونو
ته مــو ترې ایستی شـې، پتره ګره؟
ډیر زړونه یـو بل نه مـــــروره دي
ته یې پخلا کــــوی شې، پتره ګره؟
دا تــــیارې نـــــفرتــــــونه او کینې
له زړونــو پاکــوی شې ،پتره ګره؟
نه دي پوهه شوي، د ښکلا په ژوند
نو ته یې، پوهوی شــې ،پـتره ګره؟
هر خــوا ته ټـــوټې مو اندامونه دي
بیا ته يې نښلوی شـــې، پــتره ګره؟
را می وړه پرهـر پرهــر بــدن تاته
ته یې راته ګـــندی شـــې، پتره ګره؟
مات زړونه می راوړي دي لمن کښي
ته یې پتره کــــوی شــې ،پتره ګره؟