د سولې ارمان
کاڼي دي که بوټي که موځمکه که اسمان دی
دلته هرموجود د ورکې سولې په ارمان دی
سپر ورته سينه لکه ديوال پښتون نيولې
هر تير چې راوتی د اغيارو له کمان دی
نيل يې عاقبت وي د موسی د عزم زور دی
دلته چې راغلی کوم فرعون يا هامان دی
دلته څو شرخوښوپه هرزړه کې شک کرلی
دلته زورور په هر باور باندې ګمان دی
وخته به ټول مړه وو ددی وخت په حادثو کې
شکردی ،همته، چې مو مل په خدای ايمان دی
( عبدالحلیم همت )