غزل
ښه وایې اشنا، د ننګیالو خبرې نورې دي
پوې شه، د الفت د لېونو خبرې نورې دي
دا لږه کیسه زما د غم وه چې دې واورېده
مکړه بیړه، ودرېږه، یو څو خبرې نورې دي
ولې پکې ستا هغه خواږه لوظونه نه ښکاري
نن خو دې د سترګو پښتنو خبرې نورې دي
بټ نه، د الفت لکه نينه هسې په تېښته یې
ما خو درته وې د سوځېدو خبرې نورې دي
راز د مینې زده کړه ترې، چې سوځي او ګډېږي هم
دا دي او کۀ نه؟ د سپېلنو خبرې نورې دي
پرېږده بېلوتۍ واعظه، وخت دی د بلبل او ګل
بیا به اؤرو، نن د اورېدو خبرې نورې دي
موسک و د رقیب سره په تریو تندي مې پوهه شو
وې چې په تا باندې مې پېرزو خبرې نورې دي
څه یې وې قاصده؟ وې چې ما ته ځواب ورسېد؟
وشوه، بس د تلو او نه راتلو خبرې نورې دي
ښه دي ستا نازونه، خو لالیه زوړ استاذ یمه
مه تېرباسه ما، د تېروېستو خبرې نورې دي
څه په ډېرو میو چې ساقي راته راګورې نۀ
ستا د پېمانو او د لېمو خبرې نورې دي
ګوره حمزه خولۀ په خولۀ چې نه شې د رقیب سره
تا ته دي ښکاره چې د سړو خبرې نورې دي
(امیر حمزه خان شینواری -حمزه بابا)
14/04/2026