زېرى
تورې تيارې وې په هر لورى پرېشانى خوره وه
په مخ د ګلو د مودو نه ستومانى خوره وه
د ظلمتونو په ول ول کښې ګرفتار وو ژوندون
د هر بې وسه هر مظلوم په اوږو بار وو ژوندون
د غاصبانو سردارانو منت بار وو ژوندون.
د حق خبره چا په جار باندې کولی نه شوه
"ډيوه" د امن چا په ژوند کښې بلولی نه شوه
د "شعور چم" کښې به کېدی د لات منات خبرې
د کفر و شرک په کنايو کښې د ذات پات خبرې
چا پېژندلې د وحدت صوم و صلواۍ خبرې
بې حيائي وه تار په تار وه د حيا لوپټه
باد د وختونو وه شلولې د وفا لوپټه.
خپلو پلارانو به پخپله ښخولې لونړه
له خپله لاسه خپلې وينې زورولې لونړه
په خپل نصيب به نصيبونو ژړولې لونړه
په کانړو زړونو کښې د وينې احترام چېرته وو
هاغه "خودسرو" کښې د مينې احترام چېرته وو.
کېدل هر وختې به قلتونه په وړه خبره
د قبيلو انښتآ جنګونه په وړه خبره
د عمر عمر نفرتونه په وړه خبره
لارو کوڅو کښې به بې قدره بهېدله وينه
لکه اوبه به په هر ځائآ کښې توئېدله وينه
"د سحرونو" په ماتم به ماښامونو ژړل
د ارمانونو په "ارمان" به ارمانونو ژړل
د وخت په جبر ناتمامه حسرتونو ژړل
د ځان ځانۍ دور دوره وه ورورولي چېرته وه
د مايوسۍ لړې خورې وې خوشحالى چېرته وه
په لر و بر کښې لور په لور وې لګېدلې لمبې
د ظلم و جبر وحشتونو ترهېدلې لمبې
د تشدد په خړ سېلاب کښې لمبېدلې لمبې
د قسمتونو په زندان کښې تړقېده غلامان
په چپه خوله به غلى غلى ژړېده غلامان
دغه فرياد د مظلومانو تر اسمان اورسېد
لکه لمبه په پورته لاړ تر لامکان اورسېد
په بره بره لا په بره تر يزدان اورسېد
"جلوه" د نُور شوه راروانه د جهان په لورى
راتله راتله د لامکان نه د مکان په لورى
د عبدالله په کو د نُور دغه رنړا خوره شوه
هر چا ليده دغه رنړا په هره خوا خوره شوه
"د ادم زېرآ" ئې رښتيا کړلو رښتيا خوره شوه
د اّمنېرض بى بى لمن ته مجبتى راغی
بدرالرجى نورالهدىص خيرالورى راغی
راغآ دنيا ته د بې کسه يتيمانو اّسره
د کونډو رنډو غلامانو مظلومانو اّسره
د معزورانو د خورانو غريبانو اّسره
د عبدالله په کور راتلل راغونډېدل رنګونه
په مينه مينه ترې چاپېره تاوېدل رنګونه
که د فطرت زرې زرې وئيلې جهان کښې نغمې
نو فرښتو وئيلې په پورته لامکان کښې نغمې
خورې د مينې ورورولۍ شوې په دوران کښې نغمې
د محمدص راتلل د مينې اخوت زېری دی
د زغم برداشت هم د اخلاص او محبت زېری دی
زره زره د کائيناتو والضحى يادوى
انس و جن واړه په تعظيم زما اقاص يادوى
غنى مولا هم فرښتې صلى على يادوى
ځئ چې مونږ هم په مينه ووايو سلام په نبى ص
ډېر دُرودونه سلامونه صبح و شام په نبى ص
صلوا عليه واليه
Zeray
Layaqzada Layaq